“Тусгаар тогтнолын ордон”-д болсон МАН-ын Бага хурлын хоёрдугаар хуралдаан өндөрлөлөө. Ёс зүйн дүрмийн талаархи хэлэлцүүлэг, зохион байгуулалтын олон асуудлыг шийдвэрлэсэн энэ хуралдаанаас ТВ5 телевизийн зөвлөх Р.Сарангэрэл, НАМЗХ-ны ерөнхийлөгч Л.Оюун-Эрдэнэ нарыг орон тооны нарийн бичгийн дарга, МАН-ын бүлгийн дарга Ө.Энхтүвшин, Нийслэлийн Засаг даргын орлогч Ц.Цогзолмаа нарыг орон тооны бус нарийн бичгийн даргаар тус тус томилсон байна. Мөн МАН-ын Бага хурлаас төрийн албанд болон бусад албан тушаалд томилогдсон гэх шалтгаанаар 12 гишүүн албан тушаалаа өгч байгаа тул тэдний оронд томилогдох хүмүүсийг тодруулсан юм. Өнөөдрийн хуралдаанаар УИХ-ын гишүүн Р.Будын охин Б.Анужин, “Өглөөний сонин”-ы эрхлэгч Л.Нинжжамц, “Үнэн” сонины орлогч эрхлэгч Ц.Бүдээхүү, “Монполимет” компанийн захирал Завхан аймгийн МАН-ын дарга Ж.Жамьянтив, “MSC” группын тэргүүн дэд ерөнхийлөгч Л.Энх-Амгалан, Үндэсний “Соёмбо” хөдөлгөөний тэргүүн Б.Лхагважав, Ц.Гарамжав, Т.Болормаа,  Ж.Оюунбилэг, Ч.Пунцаг, Б.Жаргалмаа, О.Алтансүх, Л.Доржхорлоо, Б.Галсандэндэв нар сонгогдлоо. Мөн МАН-ын Удирдах зөвлөлийн гишүүнээр Нийслэлийн Засаг даргын орлогч Ц.Цогзолмааг сонгожээ. МАН-ын Бага хурлын шинэ гишүүдийн нэрсийг Нийгмийн ардчилал Монголын залуучуудын холбоо, Нийгмийн ардчилал монголын эмэгтэйчүүдийн холбооноос тус тус Бага хурлын гишүүнээр санал болгосноор хот, хөдөөгийн 130 гишүүний  санал хураалтаар сонгон шалгарууллаа.