ШӨХТГ-ын Өрсөлдөөний зохицуулалтын хэлтсийн дарга Л.Ган-Өлзийгөөс сүүлийн үед хийсэн зарим хяналт шалгалтын талаар тодрууллаа.

6

-ЭМЯ, МХЕГ зэрэг байгууллагатай хамтран эмийн сангуудад шалгалт хийсэн. Энэ талаар?

 -Энэ сарын 02-нд болсон “Жороор олгодог эмийн олголтын байдал” сэдэвт нээлттэй хэлэлцүүлгийн үеэр “Эмийн санд тавигдах нийтлэг шаардлага” /MNS 5260-2011/ стандартын асуудлыг хэлэлцсэн. Уг стандартаар 5000 хүн тутамд нэг эмийн сан байх, мөн эмийн сан хоорондын зай 500 метрээс багагүй байх” гэсэн заалт байдаг. Энэ нь манайд биелэгдэхгүй байгаа. Гэхдээ энэхүү заалт нь Өрсөлдөөний тухай хуулийн “тухайн зах зээлд өрсөлдөгч гарч ирэхийг хориглосон буюу хязгаарласан, эсхүл түүнийг зах зээлээс шахан гаргахад чиглэсэн” гэсэн заалтыг зөрчсөн байх тул стандартын хууль бус холбогдох заалтыг хүчингүй болгох талаар арга хэмжээ авч ажиллах саналыг Эрүүл мэндийн яам, Стандарт хэмжил зүйн газарт санал хүргүүлсэн.

5

-Хүнсний сүлжээ дэлгүүрүүдэд хийсэн шалгалт хийж, бараа кодлоход нэг төрлийн бараа тутмаас 5000-10000 төгрөгийн төлбөр авдгийг хүчингүй болгохоор ямар арга хэмжээ авсан бэ?

-Замбала, Номин, Миний зах, Боса, Эвридей, Макс, Веллмарт гэсэн найман  супермаркет, сүлжээ дэлгүүрүүдэд шалгалт хийсэн. Тэдгээр дэлгүүр нь харилцагч компаниудаас хамтран ажиллах гэрээний үндсэн дээр шинээр бараа нийлүүлэгдэж, кодлуулахад 5000-10.000 төгрөгийг төлбөр авч байна. Тухайн төлбөрийг компани тус бүр өөр өөр зүйлд зарцуулдаг гэх боловч кодлох ажиллагаанд тухайн дэлгүүрээс ямар нэг илүү зардал гарахгүй байгаа юм. Супермаркет, сүлжээ дэлгүүрийн дээрх үйлдэл нь Өрсөлдөөний тухай хуулийн 12.1.10-ыг зөрчсөн гэж үзэх үндэслэлтэй байна. Мөн супермаркет, сүлжээ дэлгүүр харилцагч компаниудтай хүнсний бүтээгдэхүүн буцаалтын талаар ямар ч хариуцлага хүлээхгүйгээр, хэтэрхий нэг талыг барьсан гэрээний нөхцлийг нийлүүлэгч нарт тулгадаг нь тогтоогдлоо. Энэ нь мөн Өрсөлдөөний тухай хуулийн 12.1.10-ыг зөрчсөн гэж үзэх үндэслэлтэй юм. “Номин холдинг” ХХК, “Сонгино хангай” ХХК-иудын хувьд энэ үйл ажиллагаа нь давамгай байдлаа хууль бусаар ашиглан үйлдвэрлэгч, нийлүүлэгчээс борлуулалтын нэмэлт нөхцөл шаардсан буюу Өрсөлдөөний тухай хуулийн “аж ахуй эрхлэгчээс борлуулалтын нэмэлт нөхцөлийг шаардах, зах зээлд ижил төрлийн бараа бүтээгдэхүүнийг ялгавартай үнээр борлуулах, үндэслэлгүйгээр борлуулалт хийхээс татгалзах...;”-ыг хориглоно гэж заасныг болон хэд хэдэн зүйл заалтыг зөрчсөн буайна. Үүнийг арилгуулахаар эхний ээлжид гэрээг өөрчлөх шаардлага хүргүүлсэн. Мөн бараа кодлоход төлбөр авдгийг болиуллаа.

6

-“Да хүрээ” захад хийсэн хяналт шалгалтын талаар?

-“Да хүрээ трейд” ХХК нь 1991 оны 5 дугаар сарын 19-нд байгуулагдсан одоогийн байдлаар автомашины борлуулалтын зах зээлийн 65 хувь нь төвлөрөн явагдаж байгаагийн зэрэгцээ байнгын болон улирлын шинж чанартай 5000 гаруй иргэн, аж ахуйн нэгж автотехникийн худалдаа, үйлчилгээ явуулдаг байна. Тус захын удирдлага нь зарим аж ахуй эрхлэгчтэй түрээсийн гэрээ байгуулан ажилладаггүй бөгөөд түрээсийн харилцаанаас үүсэх үүргийн биелэлтийг хангуулах зорилгоор барьцаа гэх 30.000 төгрөгийг нийт 200 зогсоолоос авч, нийт 12 сая төгрөг гаргуулан авсан нь тогтоогдсон. Энэ нь Иргэний болон Өрсөлдөөний тухай хуулийг зөрчиж байгаа юм. “Да хүрээ трейд” ХХК-ийн өнгөрөгч сарын нэгнээс 30-ныг хүртлэх кассын баримтыг авч үзэхэд 28 аж ахуй эрхлэгчид нийт 560 мянган төгрөгийн төлбөр ногдуулсан байсан. Ингэхдээ удирдлагын зүгээс хууль бусаар олон нийтийн байцаагч гэх хүмүүсийг томилон тэд нь түрээслэгчдэд торгууль ноогдуулсан байгаа юм. Эдгээр зөрчлөө арилгахыг улсын байцаагчийн албан шаардлагаар үүрэг болголоо.

6

-“Мобиком”-ын шалгалт ямар түвшинд явж байна. Хэдэн хэрэглэгчийн төлбөр хэрэглээнээсээ илүү тооцогдсоныг тогтоосон уу?

-“Мобиком” компанийн дараа төлбөрт дугаар ашигладаг зарим хэрэглэгчдийн утасны төлбөр хэрэглээнээсээ өндөр гарсан байсныг тогтоогдсон. Үүнтэй холбоотойгоор, дээрх асуудлыг хүлээн зөвшөөрсөн, тус компанийн гүйцэтгэх захирал Дэвид Холлидэйн гарын үсэгтэй албан бичиг манайд ирсэн. Одоогийн байдлаар яг хэдэн хэрэглэгчийн төлбөр илүү гарсныг тодорхой болоогүй, нарийвчилсан шалгалт хийгдэж байна. Хэрэглэгчдийн илүү төлсөн мөнгийг буцааж олгоно. Энэ нь хэрэглэгчдээс илүү мөнгөн авах гэсэн санаатай үйлдэл үү эсвэл техникийн алдаа юу гэдгийг тогтоохоор нарийвчилсан шалгалтыг хийж байгаа. Шалгалтын дүн гарсны дараа холбогдох арга хэмжээг авна. Мөн бусад үүрэн холбооны компаниудад хяналт шалгалт хийж байна.

6

Б.Буд