У.Мөнх-Эрдэнэ: Медалийн буухиаг таслалгүй ирсэндээ баяртай байгаа
Сонирхогчдын боксын насанд хүрэгчдийн дэлхийн аварга шалгаруулах тэмцээнд эх орноо төлөөлөн амжилттай оролцож хүрэл медаль хүртсэн Монгол улсын гавьяат тамирчин У.Мөнх-Эрдэнийг ССАЖ-ийн дэд сайд М.Түмэнжаргал өнөөдөр хүлээн авч уулзан, баяр хүргэлээ.
5
Тус уулзалтад тамирчны зөвлөх дасгалжуулагч болох Монгол улсын гавьяат дасгалжуулагч Г.Оюунболд болон ДАШТ-д шигшээ багийнхантай хамт яваад ирсэн ССАЖЯ-ны төрийн захиргаа удирдлагын газрын дарга н.Энхтүвшин нар оролцож тэмцээний талаар өөрсдийн байр сууриа илэрхийлж, харилцан ярилцсан.
5
Энэ үеэр МУГТ У.Мөнх-Эрдэнэ “Энэ удаагийн тэмцээн бол Дэлхий боксын холбооны түүхэнд хамгийн олон орон оролцсон тэмцээн болсон. Мөн миний урьд өмнө нь оролцож байсан тэмцээнүүдээс хамгийн шударга шүүлттэй нь болсон. Миний хувьд өөрийн хүсч, зорьж байсан амжилтандаа хүрч чадаагүй ч эх орныхоо нэрийг гаргаж, медалийн буухиаг таслалгүй ирсэндээ баяртай байгаа. Хамтарсан бэлтгэлд ороогүй учраас бэлтгэл дутуу байсан. Бусад тамирчид маань ч гэсэн алдаа оноондоо дүгнэлт хийж, дараа дараагийн тэмцээнд сайн оролцох хэрэгтэй. Монгол улсын баг тамирчид дэлхийд шилдэг нь байгаасай гэж би хүсдэг. Үүний тулд би ч гэсэн өөрийн чадах зүйлээ хийх болно. Ер нь Дэлхий боксын холбоо маш их шинэчлэлт хийж байгаа. Хүмүүсийн сонирхлыг татахын тулд дуулгагүй тоглуулдаг боллоо гэх зэрэг. Казахстан улсад тэмцээнд оролцоход цаг, уур амьсгалын өөрчлөлт багатай учир эх орондоо байгаа мэт дотно байдаг. Казахууд өөрсдөө боксын спортод дуртай ард түмэн, ялангуяа өөрийн нь тамирчинтай таарч тоглоогүй тохиолдолд манай тамирчдыг уухайлан дэмжиж байсан” хэмээн ярилаа.
5
Тэмцээнийг дэргэдээс нь үзэж ялагдал, ялалтыг тамирчидтайгаа хамт мэдрээд ирсэн ССАЖЯ-ны төрийн захиргаа удирдлагын газрын дарга н.Энхтүвшин “Тэмцээн зохион байгуулалтын хувьд маш сайн болсон. Гэвч Монгол улс өөрийн гэсэн шүүгчтэй болох зайлшгүй шаардлагатай гэдгийг эндээс мэдэрлээ. Манай улсын болон зарим орны тамирчдын оноог дарж байсныг тэмцээнийг үзсэн хүмүүс ажигласан байх. Дараагийн олимп, дэлхийн аваргын тэмцээн болоход манай улс шүүгчтэй болох хэрэгтэй байна” гэдгийг дэд сайдад уламжилсан.
6
ССАЖ-ын дэд сайд М.Түмэнжаргал “Энэ тамирчинг ямар зүйл давж очоод тэмцээнд хэрхэн оролцсоныг Монголчууд мэдэж байгаа. Энэ удаагийн ДАШТ бидэнд сургамж өгсөн, олон онцлогтой тэмцээн боллоо. Нэгэнт энэ салбарыг хариуцсан яамтай болсны хувьд, энэ спортод ач холбогдол өгч, шигшээ багийг бүрдүүлэх тал дээр анхаарч ажиллана. Үүнээс гадна тамирчдын бэлтгэл сургуулилт болон сэтгэлзүйг бэлтгэх тал дээр спортын эрдэм шинжилгээний байгууллагуудтай хамтран ажиллана. Цаашид олон улсын чанартай тэмцээн уралдаанд эмч, сэтгэлзүйчийг тамирчидтайгаа хамт оролцуулж байх нь зүйтэй юм. Ялангуяа шигшээ багийн энэ тал дээр анхаарч ажиллана. Бүх зүйлийг холбоо гээд орхиж болохгүй юм байна гэдгийг саяны үйл явдал харуулаа. Бүгд хичээж зүтгэж байж энэ амжилтад хүрч байна. Өнгөрсөн тэмцээнээс бид үүнээс илүү амжилтыг хүлээж байсан, гэхдээ олон улсын тавцанд Монголынхоо нэрийг авч гарч ирсэн нь маш том үйл явдал. Судлаачид монгол хүний физиологийн оргил үеийг 28 наснаасаа эхэлдэг гэж тогтоосон. Таны хувьд ид үедээ явж байна. Бэлтгэл сургуулилт, сэтгэл зүйдээ сайн анхаар. Дараагийн уралдаан тэмцээнд яамны зүгээс дэмжиж, хамтран ажиллах болно” гэж хэлсэн юм.
Б.Буд
Гэрэл зургийг Б.Мөнх-Эрдэнэ
СЭТГЭГДЭЛ БИЧИХ