Бүгд Найрамдах Киргизстан Улсын шинээр сонгогдсон Ерөнхийлөгч Алмазбек Атамбаев ирэх 12 дугаар сарын 1-нд тангараг өргөнө. Тэрээр тангараг өргөх ёслолын үйл ажиллагаандаа Монгол Улсын Ерөнхийлөгч Цахиагийн Элбэгдоржийг урьсан байна. Энэхүү урилгын дагуу Монгол Улсын Ерөнхийлөгчийн Тамгын газрын дарга Д.Баттулга өнөөдөр Киргизстан Улсыг зорилоо. Ерөнхийлөгчийн Тамгын газрын дарга Д.Баттулга Киргизстан Улсад айлчлахдаа шинээр сонгогдсон Ерөнхийлөгчид Монгол Улсын Ерөнхийлөгчийн илгээлтийг гардуулах бөгөөд одоогийн Ерөнхийлөгч Роза Отунбаеватай уулзана. Роза Отунбаева нь 2010 оны долдугаар сарын 3-нд албан ёсоор Киргизстаны  Ерөнхийлөгч болсон юм. Тэрээр Төв Азийн орнуудын хувьд анхны эмэгтэй ерөнхийлөгч билээ. Шинэ Ерөнхийлөгч Алмазбек Шаршенович Атамбаев нь 1956 онд төрсөн бөгөөд 2010 оны 12 дугаар сарын 17-ноос тус улсын Ерөнхий сайдаар ажиллаж ирсэн Киргизстаны нэр хүндтэй улс төрчдийн нэг юм.