Монголын рок попын урлагт томоохон байр суурь эзэлж, өөрийн гэсэн өнгө төрхийг бий болгосон “Хурд” хамтлаг үүсэн байгуулагдсаны 20 жилийн ой энэ онд тохиож байгаа билээ.

7

Тус хамтлаг 20 жилийн ойн тоглолтдоо зориулсан хэвлэлийн хурлаа өнөөдөр “Grand Khaan” Irish pub-д хийлээ. Хэвлэлийн хуралд хүрэлцэн ирсэн хэвлэл мэдээллийн ажилтнуудад мэдээлэл авах боломж нээлттэй байж  “Цэргийн бодол”, “Эх орон” гэх монгол түмний хайртай уран бүтээлээ толилуулсан зэрэг нь зохион байгуулагчид ширээний ард суугаад, сэтгүүлч жижүүрийн асуулт асуудаг бусад хурлаас өөр байлаа.

6

“Хурд” хамтлагийн ахлагч Д.Ганбаяр “Манай хамтлаг 1993 онд байгуулагдаж, гитарын утсаа амраалгүйгээр, монгол хэлийг сонсч мэддэг бүх үзэгч, сонсогчтойгоо хамт нартай, бороотой, салхитай, шороотой олон өдрийг хамтдаа өнгөрүүлжээ. Энэ бүх хугацаанд хамтдаа байсан та бүхэндээ мэхийн ёсолъё. Бид энэ ойгоороо зөвхөн тоглолт хийгээд өнгөрөх биш фенүүддээ үлдэх “хурд” нэрийн брэнд, хөгжмийн холбогдолтой зүйл, жижиг сувинеруудыг хийлээ. Мөн алтан пянз хэвлүүллээ. Энэ бол амьд хөгжим тоглодог хамтлагуудын мөрөөдөл байдаг. Бас хэдэн жил үйл ажиллагаа явуулж байгаа, хэдэн тооны цомог гаргасан зэрэг шалгуурууд байдаг юм байна. Бүх шалгуурыг давж Азиас тэр тусмаа Монголоос алтан пянз хэвлүүлсэндээ баяртай байгаа. Монголын рок поп урлагийн хөгжил юм даа. Дэлхийн одууд алтан пянзаа хийлгэдэг АНУ-ын Лос-Анжелесийн үйлдвэрт хэвлүүлсэн. Лэди-Гагагийн алтан пянз хөвөрч гараад дараагаар нь “Хурд”-ынх орсон гэхээр энэ чинь Монгол юм шүү дээ гээд баярламаар, бахархмаар сэтгэгдэл төрсөн. Бидний алтан пянз маань тус үйлдвэрт болон Холливудын “Guiater Center”-т залагдана” гэж ярилаа. Түүнээс “Хурд” яг одоо хэдэн км/цагийн хурдтай давхиж байна гэж асуухад “Бид яг өнөөдөр машины хурдаар гэвэл 80 орчим км/цагийн хурдтай явж байгаа болов уу. Тоглолт дөхөх тусам хурд түргэснэ. Тоглолт дээрээ 100 км/цагийн хурдтай явна гэж бодож байгаа. Гэхдээ болоогүй байна, машин чинь цаашаа хурдалдаг шүү дээ” гэж хариулсан.

6

Тэд урын сангаасаа шилж тус бүрдээ 11-16 дуунаас бүрдсэн 12 цомогтой “Black box” гаргажээ. Мөн “Хурд” нэрийн гитар, футболк, гитарын болон бөмбөрийн цохиур, гар болон хүзүүний зүүлт гаргасан байна. Эдгээр зүйлийг 20 жилийн ойн тоглолтын үеэр фенүүд нь худалдан авах боломжтой аж.

6

Тэдний 20 жилийн хугацаанд бүтээж үзэгч, сонсогчиддоо хүргэсэн шилдэг дуунуудаас бүрдсэн тоглолт болоход гурван хоног үлдлээ.

66

Б.Буд