Өчигдөр Улаанбаатараас боксын үндэсний шигшээ багийнхан маань хоёр хуваагдан Куба, Казакстаныг зорилоо. Ирэх хавар Астанад болох Азийн аваргаас өмнөх олон улсын хэмжээний халаалтын тэмцээнүүдэд оролцох ширэн бээлийтнүүд маань мордсоны дунд Монгол Улсын гавьяат тамирчин, Хөдөлмөрийн баатар Энхбатын Бадар-Ууган маань багтжээ. Дэлхийн шилдэг боксчноор тодорсон, олимпийн алтан медалийг хэд ч давхарлаж авах хэмжээний “илүү” тоглолт үзүүлж, гуядаж авсан Э.Бадар-Ууган их спортдоо эргэн ирж буй баяртай мэдээ таны, миний чихийг дэлсэж эхэллээ. Алтан соёмбот далбаагаа “Шувууны үүр”-нд мандуулж хотол олныхоо магнайг тэнийлгэн хязгааргүй баяр бахархалд умбуулж байсан Бадар-Ууган маань Бээжингийн олимпоос хойш бэртлийн улмаас рингэндээ гарч амжаагүй байсан юм. Тив, дэлхийн тэмцээнүүдэд олимпийн аваргаа харахыг хүссэн монголчуудын хүсэл тун удахгүй биелэх болжээ. Олимпийн аварга хэмээх хүндтэй алдрыг хүртсэн түүний хувьд гэмтэл бэртэл нь төдийлөн илааршихгүй, хажуугаар нь “оддын өвчин тусав” гэх мэт элдэв бусын атаархал, хэл ам дагуулсан үгс түүнийг алтан рингэндээ гараагүй удсан энэ хугацаанд багагүй зовоосон. Энэ хугацаанд тэрбээр дээр дурдсан шиг ямар нэгэн оюун санааны өвчин туссангүй, харин биеийн гэмтлийг арилгахаар зүтгэж, хажуугаар нь бэлтгэлээ базаасаар өдийг хүржээ. Сүүлийн үед бэртэл нь илааршиж рингэнд тулалдах боломж олгосон учир бэлтгэл сургуулилтаа тэвчээр заан базаасаар ийнхүү хилийн дээс алхан тулалдахаар шигшээ багийнхантайгаа дахин морджээ. Ид залуу 26-тай аварга маань ийнхүү их спортдоо эргэн ирлээ. Ирэх жилийн хавар Казакстаны Астанад Ази тивийн аварга шалгаруулах тэмцээн болно. Энэ бол олимпийн эрх горилох Ази тивийн ширэн бээлийтнүүдийн сүүлчийн найдвар. Нийтдээ манай тивийн 25 боксчин Лондонг зорих визээ халааслах юм. Манай боксчдын хувьд ч Астана бол олимпийн эрхээ саяхан ДАШТ-аас өвөртөлчихсөн П.Сэрдамба, У.Мөнх-Эрдэнэ нарыг эс тооцвол хамгийн том боломж. Олимпийн аваргын маань тулалдах 57 кг-ийн жинд Азиас зургаан боксчин Лондонг зорихоос гурав нь эрхээ авчихсан. Үлдсэн гурван эрхийн нэгийг авахын төлөө Э.Бадар-Ууган маань Астанагийн рингэнд гарах учиртай. Тиймээс л одооноос эхлэн Астанад зохиогдох том бага тэмцээнүүдэд оролцож дэвжээндээ дасахаар Казакстаныг зорьжээ. Техник технологи хөгжсөн одоо цагт бокс төдийгүй бүхий л спортын төрөлд өрсөлдөгчөө судлах гэдэг зүйл ялалтад хамгийн том нөлөөтэй хүчин болжээ. Саяхан ОХУ-д болсон тэмцээнд П.Сэрдамбатай тулсан өрсөлдөгч нь манай боксчны алхаа гишгээ, бүх хөдөлгөөнийг гаргууд сайн судлаж рингэнд гарсан нь илт байлаа. Нэгэнт энэ цаг үедээ өөрийн жиндээ тив дэлхийн хэмжээний топ өрсөлдөгч болчихсон П.Сэрдамба, У.Мөнх-Эрдэнэ нарыг нөгөө л хэдэн учраа нь гайгүй сайн судалдаг нь тодорхой. Харин олимпийн аварга маань олимпоос хойш рингэнд гараагүй учир өрсөлдөгчдөө битүү морь. Одоо аваргын эзгүйд тив, дэлхийн медалийг халаасалсан өрсөлдөгч нар нь эмээж байгаа. За, ямартай ч их спортдоо эргэн ирж ард түмнийхээ хүлээсэн сэтгэлийг уужруулсан аваргадаа зорьсон үйлст нь амжилт хүсье. Бээжингийн дэвжээнд гялалзсан шигээ гарсан ринг болгондоо гялалзаж, улмаар ирэх жил эх орныхоо хөрснөөс гарсан алтны хольцтой медалийг Лондонгийн рингнээс авах болтугай хэмээн хүсэн ерөөе. Илүү, илүү аваргаа.