“Цолмон ус" ХХК Шударга өрсөлдөөн хэрэглэгчийн төлөө газрын эсрэг шүүхэд гомдол гаргахаар болжээ.

Учир нь өнөөдөр ШӨХТГ-ын Зар сурталчилгааны хэлтэс, УСУГ-ын дарга Х.Үнэн, Усны төв лабораторын эрхлэгч Б.Урнаа нартай хамтран мэдээлэл хийсэн. Уг мэдээллээр “Штиммэ Лэбэнс”, “Цолмон-Ус” ХХК-иуд нь ОХУ-ын “Фаворит” компаниас импортлон оруулж ирсэн “Stimme Lebens” нэрийн ус цэвэршүүлэгч төхөөрөмжийг айл өрхүүдээр явж борлуулахдаа тэдний бүтээгдэхүүний нэр хүндэд илтээр нөлөөлөхүйц сурталчилгаа хийж байгааг хуулийн дагуу шалгаж өгөх хүсэлтийг “Жем Хужирт” ХХК, “АПУ” ХХК зэрэг аж ахуйн нэгжээс ШӨХТГ-т ирүүлжээ. Уг хүсэлтийн дагуу дээрх компаниудыг шалгахад Өрсөлдөөний тухай хууль, Зар сурталчилгааны тухай хууль, “Хэрэглэгчийн эрхийг хамгаалах тухай хуулийг тус тус зөрчсөн нь тогтоогдсон гэдэг. Тиймээс энэ компаниудад Өрсөлдөөний тухай хуулийн дагуу тус бүр арван сая төгрөгийн торгуулийн ногдуулж, зөрчлийг дахин давтан гаргасан тохиолдолд үйл ажиллагаа явуулах зөвшөөрлийг нь цуцлах хүртэл арга хэмжээ авахыг анхааруулсан юм.

Гэтэл “Штиммэ Лэбэнс”, “Цолмон-Ус” ХХК-иуд дээрх асуудлын талаар мэдэгдэл гаргаж “Бид  Жем Хужирт” ХХК, “АПУ” ХХК зэрэг аж ахуйн нэгжийн цэвэр усыг зар сурталчилгаандаа ашигласан зүйл байхгүй. Зарим тохиолдол хэрэглэгчид тусгайлан савласан усыг манай шүүлтүүрээр шинжлүүлэхийг хүсдэг. Тийм тохиолдолд хэрэглэгчдийн хүсэлтээр шинжилсэн. Тиймээс ШӨХТГ-ыг хууль бусаар нэг талыг барьсан шийдвэр гаргасан гэж шүүхэд өгөхөөр боллоо” гэв.

Б.Одон