БНСУ-ын Зохиолчдын Академийн санаачлагаар "Солонгос-Монголын утга зохиол" сэтгүүлийн анхны дугаар хоёр оны босгон дээр хэвлэгдэн гарчээ.

Тус сэтгүүлийг БНСУ-ын Зохиолчдын Академийн захирал, Улаанбаатар Их Сургуульд зочин багш  Ким Ханьчан эрхлэн гаргажээ. Тэрбээр манай улсад ажиллаж байх хугацаандаа утга зохиолын ахмад, шинэ үеийн төлөөлөгч нартай уулзаж, хамтарсан семинар зохион байгуулсан байна. Энэхүү уулзалт,  семинарын үеэр  талууд Монгол-Солонгосын утга зохиолын харилцан хамтын ажиллагааг хөгжүүлэх, ази тивд сурталчлан таниулах, сэтгүүл эрхлэн гаргах, бүтээлүүдээ харилцан орчуулах зэрэг өргөн сэдвээр хамтарч ажиллахаар тохирч "Утга зохиолын хамтын ажиллагааны гэрээ" байгуулжээ.

Энэхүү сэтгүүл нь хамтран ажиллах үйл ажиллагааны эхлэл болж байгаа юм. "Солонгос-Монголын утга зохиол" сэтгүүлийн анхны дугаарт Монгол, Солонгос нийлсэн 43 яруу найрагчийн бүтээл Монгол-Солонгос хадмал орчуулгатайгаар хэвлэгджээ.

Сэтгүүлийн анхны дугаарын орчуулагчаар Улаанбаатар Их Сургуулийн Солонгос хэлний тэнхмийн багш Э.Баярмаа ажилласан байна.

Б.Буд