Олон улсын жүдо бөхийн холбооноос зохион байгуулдаг тэмцээн бүрийнхээ дараа бөхчүүдийн чансааг гаргадаг.  Энэ оны сүүлийн тэмцээн болох Чэжүгийн Гран-При тэмцээний дараа эрэмбэ шинэчлэгдсэн. Энэ жагсаалтаар манай улсын бөхчүүдээс 66 кг-д Д.Төмөрхүлэг, 73 кг-д С.Ням-Очир нар тус бүрийн жиндээ тэргүүлж байгаа билээ.

Тэгвэл Олон улсын жүдо бөхийн холбоо /IJF/ шинэ оны эхний өдөр Лондонгийн олимпиос хойш 2016 оны олимпийн эрхийн оноо цуглуулан, 2014 он хүртэл эрэгтэй, эмэгтэй долоон жингийн чансааг тэргүүлж буй 14 жүдочийг урамшуулах болсныг дуулгажээ.

Ингэхдээ жингээ тэргүүлсэн шилдгүүдийг 10 мянган ам.доллараар шагнахаар болжээ. Энэ шагналыг манай улсаас Д.Төмөрхүлэг, С.Ням-Очир нар гардах нь тодорхой болоод байгаа юм. Дэлхийн шилдгийн шилдгүүдийг тэргүүлж, тогтмол амжилт гаргасан жүдочдыг дэмжих, тамирчдын дунд өрсөлдөөн бий болгох зорилготой  энэхүү урамшуулал цаашид уламжлал болон олгогдох юм байна.

Б.Буд