Хөдөлмөрийн яамны харьяа Ховд аймаг дахь “Хөгжил” политехникийн коллежийн багш нар тус сургуулийн захирал асан Б.Бадрахын хууль зөрчсөн үйл ажиллагаануудыг олон нийтэд дэлгэлээ.

Б.Бадрах нь 2005-2013 оны тавдугаар сарын 27-ныг хүртэл “Хөгжил” политехникийн коллежийн захирлаар ажиллах хугацаандаа удаа дараа хууль зөрчиж,  төсвийн мөнгийг хувьдаа завшдаг байсан нь баримтаар нотлогджээ. Тодруулбал, 2012 оны 12 сарын 25-нд өөрийн төрсөн дүү Б.Алтанцэцэгийн компаниас Land-105 машиныг сургуульд авна гээд 68 сая 500 мянган төгрөгийг төсвийн батлагдсан эх үүсвэрээс биш, урсгал санхүүжилтээс шилжүүлсэн. Гэтэл дөрвөн сарын дараа сургуульд Lexus-470 машин авчирч өгсөн. Сургуулийн 20 га газрыг 80 га газар болгож, хуурамчаар бичиг баримтыг нь үйлдэн, өөрийнхөө хувийн газар дээр нийт 150 сая төгрөгийн өртөгтэй усжуулалтын системийг авч газар тариаландаа хэрэглэсэн. Вакум цонхны тоног төхөөрөмж авах гэж байна гээд 20 сая төгрөгийг шилжүүлсэн боловч тоног төхөөрөмж нийлүүлэгдэхгүй байснаар 2010 оны тавдугаар сард Б.Бадрах захирал өөрөө БНХАУ-аас авчирсан.

Дөрөвдүгээрт ямар нэгэн дуудлага худалдаа явуулалгүй хууль бусаар сургуулийн балансад байдаг 18 сая 123 мянган төгрөгийн үнэтэй “Mitsubishi pajero” автомашиныг хоёр сая төгрөгөөр,  6.563.100 төгрөгийн үнэтэй “Уаз-31-512” маркийн автомашиныг 500 мянган төгрөгөөр хувьдаа авч, зарж борлуулсан. Ховд аймгийн “Намуун Ховд” худалдаа үйлчилгээ эрхэлдэг дэлгүүрийн данс руу сургуулийн байрны сантехникийн урсгал засварыг хийлгэхээр 29.920.000 төгрөгийг шилжүүлсэн боловч тус   байгууллага нь засвар үйлчилгээ хийгээгүй. Сургуулийн хоёр слесарь ажлыг гүйцэтгэн тус бүр нэг сая төгрөгийн хөлс авсан. Сургуулийн дансанд бүртгэлтэй байгаа “DT-75” трактор, “Нева” комбайн болон МТЗ, ЮМЗ тракторыг тус бүрийг 100 мянган төгрөгөөр хувьдаа авах тогтоол үйлдсэн. Долоодугаарт, сургуулийн 1400 орчим суралцагчтай гэрээ хийлгүйгээр, нэг бүрчлэн “Миг” даатгалд хамруулж нийт даатгалын мөнгө болох 4 сая 500 мянган төгрөгийг оюутан тус бүрийн мөнгийг тооцон тэтгэлэгээс нь авсан гэж тус сургуулийн нягтлан бодогч М.Өлзийхишиг ярьсан юм. Түүний дээрх үйлдлүүдийн баримтаар нотлон, шалгаж үзэхэд 613.593.300 төгрөгийн хөрөнгө завшсан гэдэг нь тогтоогдоод байгаа аж.

Б.Бадрахын энэхүү хууль зөрчсөн үйл ажиллагааг “Хөгжил” коллежийн багш, ажилчид 2012 оны 12 дугаар сараас мэдэж, өнгөрөгч оны хавраас эхлэн хууль хяналтын байгуулагад хандан шалгуулж эхэлжээ. Ховд аймгийн прокурор хяналт тавин ажиллаж, Б.Бадрахыг ажлаас нь түдгэлзүүлээд, үргэлжлүүлэн шалгаж байжээ. Гэтэл АТГ-ын мөрдөн байцаагч н.Нандинболор хэргийг шалгаж үзээд гурван үйлдэл нь гэмт хэргийн бүрэлдэхүүнгүй, хоёр үйлдэл нь гэмт хэргийн хөөн хэлэлцэх хугацаа дууссан, нэг хэрэг нь үлэмж хэмжээний хохирол учруулсан тул нийслэлийн прокурор руу шилжүүлсэн байдаг аж. Хамгийн хачирхалтай нь хэргийг Ховд аймгийн иргэн, тус нутагт үйлдсэн, хохирогч нь Ховд аймгийн иргэд байтал хэргийг Нийслэлийн прокурорт шилжүүлсэн байна. Гэтэл нийслэлийн прокурор Б.Энэрэл 2013 оны 09 дүгээр сарын 02-ны өдөр 358, 209 тоот дугаартай хэргийг хэрэгсэхгүй болгосон хоёр тогтоол үйлджээ.

5

Тэгээд энэ тухай хохирогч тал болох “Хөгжил” коллежийн багш ажилчдад мэдэгдэлгүй өнгөрчээ. Тэд дээд шатны нийслэлийн прокурорын орлогч н.Батболд, улсын прокурорын орлогч н.Эрдэнэбат нарт мөн гомдол гаргахад хяналтын прокурор хэргийг зөв шийдсэн гэдэг хариу өгчээ. Хохирогчид буюу “Хөгжил” политехникийн коллежийг сэргээх түр хорооныхон энэхүү хэрэг нь удааширч байгаа нь прокуроруудын буруутай үйл ажиллагаанаас болсон гэж үзээд хэргийг үнэн зөвөөр нягтлан, шалгаж өгөхийг хүсч Улсын Ерөнхий прокурор Д.Дорлигжавт хандсан байна. Харин Б.Бадрахын хувьд хэргийг нь хэрэгсэхгүй болгосон учир эргэн ажилдаа орохоор Захиргааны хэргийн шүүхээр хөөцөлдөж байгаа аж.

“Хөгжил” политехникийн коллежийн Монгол хэл, уран зохиолын багш Г.Мядагсүрэн “Б.Бадрах захирал байхдаа 2006 онд Говь-Алтай аймагт болсон “Баруун бүсийн урлаг спортын наадам”-д оролцоод буцах замдаа архидан согтуурч жолоо сольсоны улмаас хоёр залуу багшийн аминд хүрсэн тохиолдол бий. Энэ мэтчилэн хууль бус үйлдэл хийж явдаг хүн Төрийн албанд шургалаад байна. Түүнийг дахин томилуулахгүйн тулд цаашид тэмцэлээ үргэлжлүүлнэ” гэж ярьсан юм.

5

Б.Буд