БНСУ-д албан  ёсны айлчлал хийж буй ГХ-ны  сайд Л.Болд тус улсын Гадаад хэргийн сайд Юн Бен Сэ-тэй албан ёсны хэлэлцээ хийсэн байна. Хэлэлцээрээр  хоёр орны харилцаа, хамтын ажиллагаа, харилцан сонирхсон асуудлуудаар санал солилцжээ.   Уулзалтын эхэнд талууд хоёр орны харилцаа “Иж бүрэн түншлэл’’–ийн түвшинд бүхий л салбарт өргөжин хөгжиж байгааг тэмдэглээд харилцааг гүнзгийрүүлэхэд энэ айлчлал чухал хувь нэмэр оруулна гэдэгт итгэлтэй буйгаа онцолж байна. Энэхүү айлчлал нь Монгол Улсын Гадаад харилцааны сайдын түвшинд БНСУ–д сүүлийн 10 жилд хийж буй анхны албан ёсны айлчлал гэдгээрээ онцлог аж.  ГХ-ны сайд Л.Болд хэлэлцээрийн туршид монгол иргэдийн БНСУ-д зорчих нөхцөлийг хөнгөвчлөхтэй холбоотой асуудлыг удаа дараа хөндөн тавьжээ. Тухайлбал хоёр жилийн өмнөх хэлэлцээрээр энэ асуудалд тодорхой ахиц гарсаныг тэмдэглээд цаашид иргэд харилцан зорчих нөхцлийг улам илүү сайжруулах, визгүй зорчуулах арга хэмжээ авч хэрэгжүүлэх саналтай  байгаагаа илэрхийлэв. Гэхдээ үүнээс өмнө одоогийн нөхцөлд манай иргэд виз мэдүүлэхэд мөнгөн барьцаа авч байгаа нь 2012 онд байгуулсан хэлэлцээрийг зөрчиж байгаа тул барьцаа мөнгө авахыг зогсоох санал тавьсан байна.   БНСУ-ын Гадаад хэргийн сайд Юн Бен Сэ монгол иргэдийн зорчих нөхцөлийг илүү хөнгөвчлөх, мөнгөн барьцаа авахгүй байх боломжийг судалж үзэх, цаашид монгол иргэд тус улсад визгүй зорчих хэлэлцээр байгуулах боломжийг бий болгоход анхаарч ажиллахаа илэрхийлжээ.

6

Манай улстай ойр дотно хамтын ажиллагаатай БНСУ–аас Монгол улсад хийгдсэн хөрөнгө оруулалт нь байж болох боломжит түвшнээс доогуур байгааг харилцан хүлээн зөвшөөрч энэ чиглэлээр дорвитой томоохон өөрчлөлт хийх нь чухал гэдэгт санал нэгджээ. Ингэхдээ манай уул уурхай, дэд бүтэц зэрэг бүтээн байгуулалтын томоохон төсөл, хөтөлбөрт хөрөнгө оруулалт, технологи, хүний нөөц, менежментийн чиглэлээр харилцан ашигтай хамтын ажиллагааг гүнзгийрүүлэн хөгжүүлэх ажлыг эрчимжүүлэхийн тулд Засгийн газар хоорондын Эдийн засгийн хамтын ажиллагааны механизм байгуулах нь зөв гэдэгт санал нэгдсэн байна.  Мөн хоёр орны иргэдийн дундах тухайн орныхоо талаар бодит мэдлэг, ойлголт, эерэг сэтгэгдлийг илүү сайжруулах, ингэснээр эдийн засаг, соёлын харилцааг өргөжүүлэх чиглэлээр ГХЯ-нд хамтран ажиллахаар шийдвэрлэв. 2015 онд Монгол Улс, БНСУ-ын хооронд дипломат харилцаа тогтоосны 25 жилийн ой тохионо. Энэ хүрээнд өндөр дээд хэмжээний айлчлал зохион байгуулах нь зүйтэйг талууд тэмдэглээд БНСУ-ын Гадаад хэргийн сайд Юн Бен Сэ  Монгол Улсын Ерөнхийлөгч Цахиагийн Элбэгдоржид өөрийн улсын Ерөнхийлөгч хатагтай Пак Гын Хэ-н мэндчилгээг уламжилж, тааламжтай үедээ БНСУ-д айлчлахыг урьжээ.