Н.Алтанхуяг: Шатахууны үнэ 10-20 төгрөгөөр нэмэгдэхэд Засгийн газар хяналт тавихгүй
Монгол Улсын Ерөнхий сайд Н.Алтанхуягийн хэвлэл мэдээллийнхэнтэй хийдэг “Ерөнхий сайд-30 минут” уулзалт боллоо. Ерөнхий сайд Н.Алтанхуяг өнгөрсөн долоо хоногт Засгийн газрын хуралдаанаар шийдвэрлэсэн асуудлууд болон цаг үеийн бусад асуудлын талаар мэдээлэл хийсэн юм. Өнгөрсөн долоо хоногт Засгийн газрын хуралдаанаар баталсан “Ой цэвэрлэгээ” хөтөлбөрийг олон талын ач холбогдолтой хэмээн Ерөнхий сайд онцолж байлаа. Эдийн засгийн хөгжлийн сайд Н.Батбаяр, ЗТ-ийн сайд Л.Гансүх нар БНХАУ-д томилолттой яваа аж. Энэ хүрээнд салбар салбарынхаа асуудлаар Хятадын талын сайд нартай уулзаж, төмөр зам, нүүрсний экспорт болон эдийн засгийн асуудлаар хэлэлцээр хийх юм байна. Ерөнхий сайд Н.Алтанхуяг мэдээлэл хийснийхээ дараа сэтгүүлчдийн сонирхсон асуултад хариулсан юм.
:
-Шатахууны үнэ нэмэгдсэн нь “Үнэ тогтворжуулах хөтөлбөр”-ийн хэрэгжилт дууссантай холбоотой юу?
-Засгийн газар “Үнэ тогтворжуулах хөтөлбөр” хэрэгжүүлснээр шатахууны үнийг барьж чадсанаар барахгүй, 50 төгрөгөөр бууруулсан. Шинэ он гарснаар шатахууны үнэ огцом өсөх шалтгаан байхгүй. 10-20 төгрөгийн хооронд нэмэгдэхэд Засгийн газар хяналт тавихгүй. Харин 90 төгрөгөөр өсөх шалтгаан байхгүй. Бид тав, 10 төгрөгийн үнийн хэлбэлзлийг барихгүй.
.
-“Буянт-Ухаа” хороололд орон сууц авах сонирхолтой иргэд хаана хэрхэн хандах вэ? Журам батлагдсан болов уу?
-“Буянт-Ухаа” хороололд 1700 айлын байр байгаа. Засгийн газар зорилтот бүлгүүдийг тодорхой хэмжээгээр хамруулахаар бодлого барьж байна. Энэ дагуу маргааш Засгийн газрын хуралдаанаар журам гаргана.
_
-Төсвийн тодотголыг хэзээ хийх бол?
-Хаврын чуулган эхлэхэд төсвийн тодотгол хийнэ. Бид авлигажсан төсөвтэй объектуудыг түр зогсоосон байгаа. Аудитийн дүгнэлт өнөөдөр Засгийн газарт ирж байгаа. УИХ-ын хаврын чуулган эхлэхэд Төсвийн тодотголоо өргөн барина.
_
-Үйлдвэржилтийн жилийн хүрээнд хийгдэх төслүүд ямар шатандаа яваа бол?
-Төслийн шалгаруулалт эхлээд явж байна. Ил тод байдлыг хангах чиглэлээр Хөгжлийн банк ажиллаж байна. Экспортыг дэмжих, импортыг орлох 1150 төслийн эхний шалгаруулалтууд Хөгжлийн банкин дээр хийгдэнэ.
_
-Энэ жил хичнээн тонн нүүрс экспортлох бол? “Чалко”-той хийж байгаа нүүрсний үнийн хэлэлцээ ямар түвшинд байгаа бол?
-34 сая тонн нүүрс экспортлох зорилттой. Өнгөрсөн жил 18 сая орчмыг экспортолсон. Үнийг нь хэлэх боломжгүй, зах зээлийн ханшаар явна. Бид дотооддоо нэмүү өртөг шингээж үлдээе, түүхий нүүрс гаргахгүй байх тал дээр арга хэмжээ авч эхэлье. Нүүрсээ угааж гаргая гэж ярьсан. Тавантолгойн нүүрсийг ч бас тодорхой хэмжээнд угааж гаргах асуудлаар ярьж байна. “Чалко”-той хийсэн өрийн нүүрс нь гарчихсан. Хоёр сая тонн нүүрс өгөөд өр хаагдана. Гэхдээ тээвэрлэлт нь дуусаагүй байгаа.
.
-Хөшигийн хөндийн нисэх онгоцны буудал барих ажлын явц ямар байна вэ?
-Хөшигийн хөндийн онгоцны буудал барих ажлын явц сайн явж байсан. “Чингис хаан” нисэх онгоцны буудалд хөрөнгө оруулалт хийе гэдэг дээр түдгэлзэж байгаа.
.
Н.Энхлэн
СЭТГЭГДЭЛ БИЧИХ