ОХУ-ын алдарт тамирчин, мөсөн талбайн хаан гэгддэг Евгений Плющенко албан ёсоор зодог тайлсанаа мэдэгдлээ. Өчигдөр бие халаалтын үеэр бэртэл авсан бөгөөд тэмцээнд оролцохоос татгалзаж, зодог тайлж буйгаа мэдэгдсэнээр олон мянган спорт сонирхогчдын урмыг нь хугалсан юм.

Плющенко Оросын “Ort 1” телевизэд өгсөн ярилцлагадаа “Баяртай. Бас урмыг нь хугалсан бүх хүнээс уучлалт гуйж байна. Миний хүч энэ хүрээд өндөрлөж байх шиг. Дараагийн олимп гэж байхгүй. Би дахин мөсөн талбай дээр гарахгүй. Дахин хэлэхэд, уучлаарай Орос орон минь. Би хүрэх ёстой бүх өндөрлөгт хүрсэн учир, харамсах зүйлгүй” гэжээ.

Түүнийг зодог тайлж буйгаа зарласны дараа ОХУ-ын Ерөнхийлөгч В.Путин өвлийн олимпийн мөсөн талбай дээр хаан шиг хаан байсанд нь баяр хүргэж, хүндэтгэл үзүүлжээ. Сочи хотын D-14 хэсэгт Евгений Плющенкогийн байрлаж буй байрны гадна олон мянган иргэн цугларч “Оросын бахархал минь баяртай. Мөсөн талбайн хаан минь баяртай” хэмээж, “өөр шигээ гайхалтай тамирчинг дасгалжуулж, мөсөн талбайдаа дахин ирээрэй” гэж ОХУ-ын төрийн дууллыг дуулцгаажээ.

Плющенко таван наснаасаа хойш тасралтгүй уран гулгалтаар хичээллэж олимпийн алт, хошой мөнгөн медалт, дэлхийн гурван удаагийн аварга, Европын зургаан удаагийн аварга, ОХУ-ын улсын 10 удаагийн аваргаар тодорч, түүхэнд нэрээ мөнхөлсөн юм.

Б.Дэлгэрцэцэг