Нүүрсний салбарын хөрөнгө оруулагчдын “Coal Mongolia” чуулга уулзалт ирэх пүрэв, баасан гарагт “SS club”-ийн хурлын танхимд зохион байгуулагдахаар болжээ. Дөрөв дэх удаагаа зохион байгуулагдаж буй тус чуулга уулзалтаар салбарын хууль эрхзүйн орчин тогтвортой болсонтой холбоотойгоор нүүрсний салбарын хэтийн төлөв, өрсөлдөх чадварыг хэрхэн нэмэгдүүлэх, үнэ цэнийн талаар хэлэлцэх аж. Чуулганыг Уул уурхайн яам, mining.mn, Ашигт малтмалын газар, “Эрдэнэс МГЛ” ХХК хамтран зохион байгуулж буй юм байна.

“Coal Mongolia”-гийн үндсэн илтгэлийг Уул уурхайн сайд Д.Ганхуяг тавих бол үүнээс гадна салбартай холбоотой бүх талын асуудлыг хөндөж 29 илтгэгч илтгэл тавих аж. Энэ удаагийн чуулга уулзалтад 8 орны 1000 орчим төлөөлөгч оролцохоор болжээ. Мөн чуулга уулзалтын үеэр 55 компани үзэсгэлэнгээ гаргаж танилцуулахын зэрэгцээ чуулганы нэрэмжит шагналыг гардуулах юм байна.

А.Жаргал