Украины нийслэл Киев хотын Тусгаар тогтнолын талбайд цугларсан жагсагчдыг цагдаа болон хүчний байгууллагынхан хүчээр тараахыг оролдож, өндөр даралттай усаар шүрсэний улмаас мөргөлдөөн үүсчээ. Жагсагчид хариуд нь чулуу, шатаагч шингэн бүхий шил, утаа цацагч, автомашины шатаасан дугуй шидсэний улмаас нэг хуягт машиныг шатаажээ. Албаныхны мэдэгдэж буйгаар, мөргөлдөөний улмаас 18 хүн амиа алдаж, 200 гаруй иргэн гэмтжээ. Амиа алдсан иргэдийн 12 нь цагдаа байжээ. Шүүхийн шинжилгээгээр тэдний нэг нь макаров гар бууны суманд өртсөн бол бусад нь калашников автомат бууны суманд өртөж амиа алдсан гэжээ. “ВВС” агентлаг “Жагсагчид галт зэвсэг хэрэглэж, машинд суусан багтай этгээдүүд жагсагчдад галт зэвсэг болон тэсрэх бодис тарааж өдөөн хатгаж байсан. Мөн үймээний үеэр Киев хотын дээгүүр агаарын цэргийн тийрэлтэт хоёр ч онгоц нисч үзэгдсэн” гэж мэдээлжээ.

Украины Батлан хамгаалах яамны сайд Елена Лукаш “Hromadske TV” ярилцлага өгөх үеэрээ “Нийслэл Киев хотод тайван байдал тогтоход сөрөг хүчний удирдагчид хариуцлага хүлээх ёстой. Тэдний үйл ажиллагаа ирээдүйн Украин, энгийн ард иргэдэд аюул учруулж байна” хэмээжээ. Томоохон агентлагууд “Мөргөлдөөний үеэр амь эрсэдсэн хүмүүсийн цогцос гудамжинд хог шиг л хэвтэж байна. Одоо хүртэл Их сургуулийн гудамжны “Крещатик” метроны гарах хаалганы дэргэд 50 гаруй насны эрэгтэй эмэгтэй хоёр хүний цогцос байсаар байна” гэж мэдээлжээ. Ерөнхийлөгч Виктор Янукович маргааш сөрөг хүчний удирдлагуудтай уулзахаар болжээ.

Б.Дэлгэрцэцэг