Хувь хүний орлогын албан татварын хөнгөлөлт эдлэх хүмүүсийн материалыг энэ сарын 15-ыг дуустал сум, дүүргийн татварын хэлтсүүд дээр хүлээн авсан. Тэгвэл дүүргүүдийн татварын хэлтэст материалаа бүрдүүлэн өгсөн иргэдийн хувь хүний орлогын албан татварын тайлангууд Нийслэлийн Татварын газарт нэгтгэгдэж, хянагдах юм байна. Үүний дараа Нийслэлийн Төрийн сан руу материалуудыг нь явуулснаар тухайн хүний нэрийн дансанд буцаан олголтын мөнгө шилжин орох аж. Харин орон нутгийн иргэдийн хувьд бүрдүүлж өгсөн материалуудыг тухайн аймгийнх нь Татварын хэлтэст мөн нэгтгэн, нягтлаад орон нутгийн Төрийн сан руугаа явуулах юм байна. Хэдийгээр иргэдийн материалыг харъяа газрын татварын хэлтсүүд хүлээж авахдаа нягталдаг боловч иргэд мөнгө хүлээн авах дансны дугаараа өөрийн биш гэр бүлийнхнийхээ дансыг бичих, үл хөдлөх хөрөнгө авсан орлогын эх үүсвэрийн нотолгоо хангалтгүй байх гэх мэтийн шалтгаанаас материал нь буцах тохиолдол гардаг байна. Хэрвээ бүрдүүлсэн материал дутуу байвал тухайн хүний утсаар эргэж холбогдох аж.

А.Жаргал