Украинд өрнөж буй цуст мөргөлдөөний улмаас тус улсын Ерөнхийлөгч Виктор Янукович нийслэл хотоос оргон зайлжээ. Тэрбээр, өнгөрсөн бямба гаригт Донецк хотоос нисэх гэж байгаад хилийн цэргийн хориглолттой тулсан байна. Онгоцны бүхээгт байсан хүмүүст нисэхийг зөвшөөрүүлэхийн тулд их хэмжээний мөнгө санал болгосон аж. Хилчид зөвшөөрөөгүй тул Янукович онгоцноос бууж хуягласан машинд суугаад нисэх буудлаас хөдөлсөн байна. Гэвч Янукович бямба гаригийн орой ОХУ-д гэр бүлийнхээ хамт очсон тухай “CCTV”  телевиз мэдээллээ.

1

Ерөнхийлөгчийн энэхүү үйлдлийн дараа Засгийн газар яаралтай хуралдаан зохион байгуулж, Ерөнхийлөгчийн үүрэг гүйцэтгэгчээр Александр Турчыновыг томилжээ. Тэрбээр, албан тушаалаа хүлээн авсны дараа ард түмэндээ хандаж, Европын холбоотой харилцаагаа сайжруулж, нэгдэх асуудлыг хэлэлцэх тухайгаа мэдэгдэж, Киев хотод цугларсан олныг итгэл найдварынхаа галыг унтраахгүй байхыг уриалжээ.

Түүний мэдэгдэлд “Бид Европын орнуудын гэр бүлдээ эргэн нэгдэх нь зөв. Маш олон сар гэр бүлээсээ тусдаа байлаа. Одоо хангалттай. Януковичийн сонголтыг ч мөн хүндэтгэж, ОХУ-тай яриа хэлэлцээг үргэлжлүүлэхэд бэлэн байна. Гэхдээ цоо шинэ, хөршийн зарчмаар харилцаагаа үргэлжлүүлэх болно. Харин ОХУ-ыг Украинд том ахын журмаар хандахыг зөвшөөрөхгүй" гэжээ. Тэрбээр мэдэгдлийнхээ төгсгөлд "Кремлийн тал Украины Европын холбоонд нэгдэх сонголтыг хүндэтгэх ёстой, бид ард түмнийхээ элч байх учиртай. Ард түмэн Европын холбоонд нэгдэхийг хүсч байна. Тиймээс Украин Европын холбоонд нэгдэх нь зөв" хэмээжээ.

:

Оросууд “гал дээр тос нэмэхгүй байх”-ыг АНУ-д сануулав

:

Дээрх мэдэгдлийн дараа ОХУ-ын Ерөнхийлөгч В.Путин, Александр Турчыновыг буруутгажээ. Тэрбээр “Украин-Орос хоёр улс олон жилийн турш найрсаг хөршөөс илүүтэй, ах дүүгийн ёсоор өнөөг хүрсэн гэдгийг мартах ёсгүй” гэжээ. ОХУ-ын  Гадаад хэргийн сайд Сергей Лавров “Украины сөрөг хүчин төрийн эрхийг булааж, жагсагчдад зэвсгээ хаяхыг уриалахын оронд өдөөн турхирч, хүчирхийллийг дэмжиж байна” хэмээн буруутгажээ. ОХУ Киев дэх Элчин сайдаа  өнөөдөр буцаан татжээ.

АНУ-ын зүгээс Украинд болж буй үйл явдлыг хууль ёсны хэмээн хамгаалаад, ОХУ-ыг тус улсын дотоод асуудалд нь оролцохгүй байхыг анхааруулсан байна. ОХУ-ын удирдлагууд хариуд нь "гал дээр тос нэмэхгүй байх"-ыг Ерөнхийлөгч Барак Обама сануулжээ.

:

Эв нэгдлийн Засгийн газар байгуулна

.

Ерөнхийлөгчийн үүрэг гүйцэтгэгч Александр Турчыновын мэдэгдсэнээр, Украин улсад маргаашнаас эв нэгдлийн Засгийн газар байгуулах талаар хэлэлцэж эхлэх аж. Засгийн эрхийг түр гартаа оруулаад буй сөрөг хүчнээс тарахгүй байх тушаал авсан жагсагч нар Киевийн төв талбайд жагссан хэвээр байгаа гэнэ. Тэд Януковичийг албан ёсоор огцорсон тухай мэдэгдэл хийхийг хүлээсээр байгаа аж.

.

Б.Дэлгэрцэцэг