Нийслэлийн удирдлагын зөвлөлийн өчигдрийн хуралдаанаар Сонгинохайрхан дүүргийн “Амьдрах ухаан төв”-д гарсан хордлогын талаар Нийслэлийн мэргэжлийн хяналтын газраас хийсэн шалгалтын тухай мэдээллийг сонссон байна. Шалгалтын дүнг Нийслэлийн мэргэжлийн хяналтын газрын дарга М.Ням-Очир танилцуулсан байна. Энэ сарын 22-ны оройн 22:23 цагт СХД-ийн Цагдаагийн 2 дугаар хэлтсээс 3 хүн хоол хүнсээр дамжих өвчнөөр нас барсан, 1 хүн  хордлогот халдварын тохиолдол илэрсэн гэсэн мэдээллийн дагуу  тус дүүргийн 6 дугаар хороо Тоосгоны 24-р гудамжинд байрлалтай “Амьдрах ухаан” сургалтын төвд СХД дэх Мэргэжлийн хяналтын хэлтсийн Эрүүл ахуй халдвар хамгааллын хяналтын улсын байцаагчид иржээ.

“Амьдрах ухаан” сургалт үйлдвэрлэлийн тусгай төв нь гэр оронгүй, тодорхой хаяггүй хүмүүсийг түр хонуулан, өдөрт 2 удаа хооллодог бөгөөд 22-ны өглөө 10 цагийн үед 1 хүн, 19 цагийн үед 2 хүн, 23 цагийн үед 1 хүн өвдөж 103-т дуудлага өгсөн байна. Өвчтнүүдийг СБД-ийн “Энэрэл” эмнэлэгт хүргэсэн ч эмнэлгийн зүгээс амь насыг нь аврах боломжгүй байжээ.

МХЕГ-аас тэдний уусан гэх "Арслант","Их Монгол" нэртэй архийг шинжлэхэд шууд үхэлд хүргэх үзүүлэлт гараагүй байна. Мөн тус төвөөс өгсөн хоол хүнсэнд шинжилгээ хийхэд, хүнсний бүтээгдэхүүнээс хордсон гэх үндэслэлгүй гэсэн дүгнэлт гарчээ. Харин нас барсан иргэд цэнхэр өнгийн шингэн уусан нь гэрчийн мэдүүлгээр тогтоогдож байгаа нь цонх угаадаг шингэн байх магадлалтай тул үхэлд нөлөөлсөн байж болзошгүй гэж үзэж байгаа юм байна.

Хуралдааны үеэр нийслэлийн удирдлагын зөвлөлийн гишүүд “Амьдрах ухаан” төвийн үйл ажиллагааг сайжруулах, нийслэлийн нутаг дэвсгэрт тэнэмэл гэх тодотголтой иргэдийг байрлуулдаг төвүүдийн чиг үүргийг тодорхой болгох шаардлагатай байгаа талаар санал хэлжээ. Нийслэлийн Засаг дарга Э.Бат-Үүл “Энэ үйл явдлаас хүнсний аюлугүй байдал, хяналт алдагдсан нь харагдаж байна. Хуурамч архи зарсан борлуулагчид хариуцлага тооцох хууль эрх зүйн орчинг сайржуулах шаардлагатай. Хамгийн гол нь үйлдвэрлэгчээс борлуулагчид хүргүүлж байгаа бүтээгдэхүүнийг бүртгэлжүүлж, хэнээс, хэзээ, хэдийг авсан гэдгийг тодорхой байлгаж, хяналт тавих нь эзэнгүй, хуурамч бүтээгдэхүүн борлуулахаас урьдчилан сэргийлж чадна. Тиймээс хүнсний аюулгүй байдлыг бүрдүүлэх, хуулийг мөрдөх нийтлэг журам боловсруулъя” гэлээ. Нийслэлийн Засаг даргын үүргийн дагуу Нийслэлийн мэргэжлийн хяналтын газар холбогдох албаныхантай хамтарч Хүнсний аюулгүй байдлыг бүрдүүлэх нийтлэг журам боловсруулахаар болжээ.

 5

Д.Цэцэг