Украины Бүгд найрамдах автономит Крым улсын парламент шуурхай хуралдааны үеэр “ОХУ-ын бүрэлдэхүүнд нэгдэх” асуудлаар санал асуулга явуулжээ. Санал хураалтад танхимын 81 гишүүн оролцсоноос 79 нь дэмжсэн тухай “Ukraine agency” мэдээллээ.

Крымийн засаг захиргаа дээрх асуудлаар 16-ны өдөр бүх нийтийн санал асуулга явуулахаар болжээ. Санал асуулга нь “Бүгд найрамдах автономит Крым улс 1992 оны Үндсэн хуулиндаа эргэн орох уу” /1992 оны Үндсэн хуульд эргэн орно” гэдэг нь Украины бүрэлдэхүүнд хэвээр үлдэж тус улстай цаашид гэрээ хэлэлцээрийн харилцаатай байна гэсэн үг/ “ОХУ-ын бүрэлдэхүүнд нэгдэх үү” гэх хоёр асуултаар явагдах аж.

Санал асуулгын хуудсыг орос, украин, крымийн татар хэл дээр хэвлэж эхэлжээ. Олон улсын ажиглагчдын үзэж буйгаар “Ирэх 16-нд болох бүх нийтийн санал асуулгад Орос ялалт байгуулах нь тодорхой. Яагаад гэвэл Крымийн хүн амын 58.5 хувь орос, 24.4  хувь украин үндэстэн бол үлдсэн 12.1 хувь нь крымийн татарууд учир санал асуулга аль талд нь ашигтай болох нь тодорхой” гэжээ.

Үүний зэрэгцээ энэ шийдвэрт “Крымийн автономит бүгд найрамдах улсын дээд зөвлөл ОХУ-ын Ерөнхийлөгч болон ОХУ-ын Төрийн Думд хандаж, Крымийг ОХУ-ын бүрэлдэхүүнд нэгтгэх ажлыг эхлүүлэх”-ийг хүссэн байна.

Крымийн бүх нийтийн санал асуулгыг Европын холбоо, АНУ, Украины Засгийн газар “хууль бус” хэмээн шүүмжилж, хариу арга хэмжээ авахаа мэдэгджээ. Энэхүү шийдвэрээс болж АНУ-ын Ерөнхийлөгч Барак Обама байр сууриа илэрхийлжээ. Тэрбээр “Крымийн бүх нийтийн санал асуулга нь Украины үндсэн хууль болон олон улсын хуулиудыг ноцтойгоор зөрчиж байна. Тиймээс нэн даруй цуцлах хэрэгтэй” гэжээ.

Б.Дэлгэрцэцэг