ОХУ-ын Крымд хэрэгжүүлж буй арга хэмжээний улмаас Европын холбооны удирдагчид Брюселль хотноо дээд хэмжээний уулзалт зохион байгуулсан тухай “ВВС” агентлаг мэдээллээ. Энэ уулзалтаар хямралыг шийдвэрлэх огцом арга хэмжээ авахаас илүүтэй ОХУ-тай Украиныг эвлэрүүлэн зуучлахыг эрхэмлэж байгаа юм.

Гэвч Крым ОХУ-д нэгтгэх асуудлаар бүх нийтийн санал хураалт явуулахаар болсон нь Украины үндсэн хуулийг зөрчсөн хууль бус алхам гэж Европын холбоо үзэж байна. Тиймээс ОХУ-ын удирдагчид хямралыг нааштайгаар шийдвэрлэх алхам хийхгүй бол Европын холбоо ОХУ-ын дээд хэмжээний уулзалтыг цуцлах, визийн хориг тавих, эдийн засгийн хориг тавих зэрэг хатуу арга хэмжээ авах болно гэжээ.

Хуралдаанд оролцож буй, Их Британийн Ерөнхий сайд Дэвид Камерон “Нөхцөл байдал хяналтаас гарч маш ээдрээтэй, тооцоолсоноос огт өөрөөр эргэж байна. Улс үндэстнүүд бие биенийхээ ашиг сонирхлыг уландаа гишгэж, тусгаар тогтнолыг нь үгүй болговол урт хугацаанд хямрал дагуулдагийг бид түүхэн сургамжаас мэднэ ” хэмээн хэлжээ.

Б.Дэлгэрцэцэг