В.И.Лениний музейг Үлэг гүрвэлийн музей болгох шийдвэрийг Засгийн газраас гаргасантай холбоотойгоор МАН-аас эсэргүүцэж, эзэмшигчийг тогтоох асуудал багагүй хэл ам дагуулсан билээ. Өмнө нь Улсын дээд шүүхийн хяналтын шатны иргэний хэргийн шүүх хуралдаанаас тус музейн барилгыг төрийн өмч болохыг тогтоосон. Гэвч МАН-аас энэ шийдвэрийг үндэслэлгүй гэж үзэн Дээд шүүхийн Ерөнхий шүүгчид хандаад байсан юм.

.

Тэгвэл өчигдөр Төрийн өмчийн хороо болон ССАЖЯ-нд Улсын дээд шүүхээс шүүхийн эцсийн шийдвэрийг ирүүлсэн байна. Иймд Монгол ньюс мэдээллийн төвд өнөөдөр ТӨХ-ны дарга Д.Цогтбаатар, ССАЖ-ын сайд Ц.Оюунгэрэл нар хамтран мэдээлэл хийлээ.

:

Төрийн өмчийн хорооны нэхэмжлэлтэй МАН-д холбогдох иргэний хэргийг дээд шүүхийн хяналтын шатны иргэний хэргийн шүүх хуралдаанаар хэлэлцэн, 2013 оны арваннэгдүгээр сарын 21-ний өдрийн 689 дүгээр тогтоолоор В.И.Лениний музейн барилгын өмчлөгч нь Төр болохыг тогтоосон. Харин МАН-ын итгэмжлэгдсэн төлөөлөгч Ш.Раднаасэд Улсын дээд шүүхийн Ерөнхий шүүгч Ц.Зоригт хандан уг тогтоолыг хүчингүй болгох талаар гомдол гаргаад байсан юм.

:

Улсын дээд шүүхийн Ерөнхий шүүгч Ц.Зориг уг гомдлыг хянаж үзээд:

“БНМАУ-ын Улсын нэгдсэн төсвийн зарлагын 1981-1986 оны нэгдсэн төлөвлөгөө”-ний “Соёл, урлаг, радио нэвтрүүлэг” гэсэн хэсэгт В.И.Лениний музейн төсөв, зарлагыг тусгайлан, харин МАХН-ын төв хорооны төсөв, зарлагад уг музейтэй холбогдсон мэдээлэл тусгагдаагүй... Зөвхөн уг барилгыг тухайн үед МАХН-ын ашиглалтад шилжүүлсэн үйл баримтууд авагдсан болохыг дурьдсан байна.

.

Музейн зориулалттай байсан барилгын өмчлөгч нь ТӨР болохыг тогтоож шийдвэрлэсэн нь хууль зөрчөөгүй, хэрэгт авагдсан нотлох баримтад үндэслэсэн байна гэж үзлээ. Тиймээс 2013 оны арваннэгдүгээр сарын 21-ний өдрийн 689 дүгээр тогтоолоор В.И.Лениний музейн барилгын өмчлөгч нь Төр болохыг тогтоосон уг тогтоолыг хүчингүй болгох үндэслэлээр дүгнэлт гаргахгүй гэж эцэслэн шийдвэрлэсэнээ энэ сарын 11-ний өдөр мэдэгдэж байна. Ингэснээр В.И.Лениний музейн барилгын өмчлөгч ТӨР болохыг эцэслэн шийдвэрлэлээ” гэжээ.

:

Улсын Дээд шүүхийн Ерөнхий шүүгчийн гаргасан шийдвэрийн дагуу Төрийн өмчийн хороо В.И.Лениний музейн барилгыг хүлээж авч, төрийн өмчид бүртгэн авах эрхтэй болжээ. Засгийн газрын 2013 оны нэгдүгээр сарын 12-ны өдрийн 11 дүгээр тогтоолын дагуу Үлэг гүрвэлийн төв музейн балансад шилжүүлэх юм байна. Харин балансаас балансад шилжүүлсний дараа ажлын хэсэг байгуулагдан засварын ажил хийж, Үлэг гүрвэлийн музейг тус барилгад  байрлуулах аж.

:

Төрийн өмчийн хорооны дарга Д.Цогтбаатар энэ үеэр “Өнөөдөр төрийн өмчийг төр нь буцааж авах болсон талаар мэдээлэл хийж байна. Бид жилийн өмнө 2013 оны гуравдугаар сарын 13-ны өдөр энэ асуудлаар анх Нийслэлийн шүүхэд хандаж байсан. Өнөөдөр нэг жилийн ой нь болж байна. Энэ хугацаанд гурван шатны шүүх хурлаар В.И.Лениний музейн барилга нь Төрийн өмч болох нь тогтоогдож, хууль бусаар хувьдаа ашиглаж байна гэж тогтоосон. Гэвч шүүхийн шийдвэрийг эсэргүүцсэн тул нэлээн их ажил, зардал чирэгдэл болж байж, төр өмчөө буцаан авч байна. Хэрэв жилийн өмнө энэ асудал шийдэгдсэн бол их олон зүйлийг амжуулж, улсын төсөвт ч багагүй мөнгө оруулах боломжийг алдлаа” гэв.

:

ССАЖ-ын сайд Ц.Оюунгэрэл энэ үеэр “Өнөөдрийн ССАЖЯ маань БНМАУ-ын Соёлын яамны хууль ёсны залгамжлагчийн хувьд тухайн үеийн Соёлын яамны хөрөнгө зардлаар бүтээгдэж, санхүүжигдэж байсан музейн барилгыг төрийн өмчид буцааж авах талаар шүүхэд зарга мэдүүлж өгнө үү хэмээн ТӨХ-нд 2013 оны 3 сарын 1-нд анх хандаж байсан. Манай хүсэлтийг ТӨХ хүлээн авч ажлын 10 хоногт багтаан Нийслэлийн шүүхэд зарга мэдүүлж, 1997 оны шүүхийн шийдвэрийг эргүүлж өгнө үү хүсэлт гаргаж байсан. Яг нэг жилийн дараа энэ зарга амжилттай өндөрлөж байгаад талархаж байна. Өнгөрсөн нэг жилийн хугацаанд хариуцагч МАН-ын хүсэлтээр 11 удаа шүүх хурал хойшилж сунжирсаар цаг хугацаа их алдсан.

:

Музейн барилгыг төр эргүүлэн авахад тусалсан Төрийн өмчийн хороонд талархаж байна. Мөн 1974-1980 онд Соёлын яамны барилга захиалагчийн албанд ажиллаж байсан ахмад зүтгэлтэн н.Батчулуун гуайд хадгалаатай байсан баримтад тулгуурласан тул онцгойлон талархал илэрхийлмээр байна. Түүнчлэн Үндэсний төв архив, Монголбанк, Соёл урлагийг хөгжүүлэх сан, Монгол кино үйлдвэрт талархал илэрхийлэхийг хүсч байна. Тэдгээрийн бидэнд өгсөн түүхийн баримтат дүрс бичлэг болон шууд туслалцааны үр дүнд зарга амжилттай өндөрлөлөө. З.Сүхбаатар захиралтай “Монгол өмгөөлөл” хууль зүйн товчоо манай яамыг төлөөлөн ТӨХ-той хамтран ажилласан.

:

Өнөөдрөөс эхлэн шүүхийн шийдвэр хэрэгжих үйл явцыг ТӨХ хариуцан бидэнд шилжүүлэх байх. Манай яамны зүгээс В.И.Лениний музейг Үлэг гүрвэлийн муезей болгох тогтоолыг хэрэгжүүлэх ажилдаа орно. 2013 оны нэгдүгээр сарын 12-ны өдөр Засгийн газрын 11 дүгээр тогтоол гарсан. Энэ тогтоолын хэрэгжилт бүтэн нэг жил хойшлоод байсан тул ТӨХ-ноос түлхүүр гардан авсан цагаас уг музейн барилгын засварын ажлыг зохион байгуулах, үзмэрийн танхимын тохижилт санхүүжүүлэх зэрэг ажилдаа орно. Бид өмнө нь музей дотор орох ямар ч боломжгүй байсан тул засвар үйлчилгээ, тохижилтын төсвийг гаргах боломж байгаагүй. Тиймээс эдгээр төсөв төлөвлөгөө санхүүжилтийг даруй шийдэн ирэх зургаадугаар сарын 1 буюу Хүүхдийн баяраас өмнө ажлаа цэгцлэхээр төлөвлөж байна. Яагаад гэвэл хүүхдүүд маань энэ өдөр Т-Батаартай эргэн уулзахыг тэсэн ядан хүлээж байгаа. Үлэг гүрвэлийн музейн танхимуудыг тохижуулах, эхний танхимын гол үзүүлбэр юу байх вэ гэдгийг ярилцсан. Та бүхэн санаж байгаа АНУ-аас авчирсан Т-Батаарыг түр музейн байранд байрлуулж байсан. Тэгвэл Үлэг гүрвэлийн музейн хаалгаар ороход хамгийн гол үзүүлбэр нь “Батаар ба түүний аав” нэртэй үзмэр байхаар сонгоод байна. Батаар маань одоо Дарханд байна. Батаар сүүл нь өөдөө өргөгдсөг байдалтай байгаа. Харин Батаарын аав гэж бидний нэрлээд байгаа үзмэр бол Байгалийн түүхийн музейд байсан сүүл нь унжсан үлэг гүрвэл. Уг үзмэрийг Батаарын адил сүүлийг нь босгож байрлуулна. Энэ ажлыг Палентологийн төв, Үлэг гүрвэлийн музей хамтран хийнэ” гэлээ.

:

П.Наран