Нийслэлийн прокурорын газрын гаднах талбайд өчигдөр цугларсан жагсагчид тус газрын хяналтын прокурор О.Мөнхбаатарын биед халджээ. Жагсагчид МАХН-ын дарга Н.Энхбаярын туслах Б.Тулгыг  “Өргөө” зочид буудал, Улаанбаатар хэвлэх үйлдвэрийн хувьчлалын хэрэгт холбогдуулан холбогдуулан шалгаж буйг эсэргүүцэн суллах шаардлага тавьж ийн уг хэрэгт хяналт тавьж буй прокурорын эрхэнд халдсан хэрэг үйлдсэн байна. Эл шаардлагыг нийслэлийн прокурорын газраас хүлээн авахаас татгалзсан бөгөөд Б.Тулгад хуулийн дагуу таслан сэргийлэх арга хэмжээ авсан байтал шүүхээс батлан даалтад гаргасныг эсэргүүцэн  үргэлжлүүлэн хорих ёстой гэх албан бичгийг Сүхбаатар дүүргийн шүүхэд өгсөн тухайгаа өнөөдөр хэвлэлийн хурлын үеэр сэтгүүлчдэд мэдээллээ.Уг хурлыг зохион байгуулсан  нийслэлийн Прокурорын газрын орлогч дарга Ё.Сагсай  хэлэхдээ   “Б.Тулгыг хуулийн хүрээнд цагдан хорих таслан сэргийлэх арга хэмжээ авсан. Гэтэл иргэдийн зүгээс хууль бус шаардлага тавьж, мөрдөн байцаалтын ажиллагаанд саад учруулж байна. Тиймээс энэхүү үйлдлээ нэн  даруй зогсоохыг жагсагчдаас хүсье” гэв. Нийслэлийн Прокурорын газрын орлогч дарга Ё.Сагсай “Аливаа хэргийг шалгахад мөрдөн байцаалтын нууц гэж бий. Тэр нууцыг задруулбал эрүүгийн хариуцлага хүлээнэ. Б.Тулгад холбоотой хэргийн мөрдөн  шалгах ажиллагаа дуусаагүй учир энэ талаар мэдээлэх боломжгүй. Мөн эрүүгийн байцаан шийтгэх хуулинд сэжигтэн яллагдагчид таслан сэргийлэх арга хэмжээг төрлөөр нь тодорхой заасан. Үүний нэг төрөл нь цагдан хорих таслан сэргийлэх арга хэмжээ. Сэжигтнийг цагдан хорих үндэслэл нь Эрүүгийн  байцаан шийтгэх хуулинд бий. Энэ үндэслэлээр Б.Тулгын цагдан хорих таслан сэргийлэх арга хэмжээг үргэлжлүүлэн авах ёстой гэж үзэж байгаа тухай ч дуулгасан байна.