Өнөөдөр 13.00 цагт ТӨХ,ССАЖЯамны хамтарсан ажлын хэсэг шүүхийн шийдвэрийн дагуу В.И.Лениний музейг хүлээн авах үйл ажиллагаа болно гэж өмнө мэдээлсэн билээ. Тэгвэл яг 13.00 цагт ТӨХ болон ССАЖЯ-ны хамтарсан ажлын хэсгийнхэн, Үлэг гүрвэлийн музейн дарга, ажилтан албан хаагчид, хэвлэл мэдээллийн байгууллагынхан тус музейн үүдэнд цуглан МАН-ын холбогдох албаныхан хүрэлцэн ирэхийг хүлээлээ. Гэвч товлосон цагтаа ирээгүй МАН-ын гишүүдийг 15 минут орчим хүлээсэн боловч МАН-ын зүгээс хэн нэгэн ирсэнгүй. В.И.Лениний музейн барилгыг хүлээн авах ажиллагаа өнөөдөр  болсонгүй. Музейн барилгыг хүлээн авахтай холбоотойгоорүлэг гүрвэлийн төв музей”-н ажилтан албан хагчид ёслолын хувцастайгаа ирсэн боловч тэдний баяр хөөр талаар өнгөрсөн юм.

6

ССАЖЯ-ны Төрийн нарийн бичгийн дарга П.Алтангэрэлээс цөөн асуултад хариулт авлаа.

-МАН-аас музейн барилгыг хүлээлгэн өгөх шаардлагад ямар нэгэн хариу өгсөн үү?

-Төрийн өмчийн хороо МАН-д энэ сарын 14-нд музейг өнөөдөр 13.00 цагаас хүлээж авах албан бичиг хүргүүлсэн. Тэр хүргүүлсэн бичгийнх нь дагуу бид музейгээ хүлээж авахаар ССАЖ-ын сайд Төрийн өмчийн хорооны хамтарсан тушаалаар батлагдсан ажлын хэсэг ирээд байна. Манай үлэг гүрвэлийн төв музейн захирал хүлээж авах ажлын хэсгийн дарга МАН-ынхантай ярилаа. Дөнгөж сая Раднаасэд гэдэг хүнтэй ярихад юу яриад байгаа юм? гээд утсаа тасалчихлаа. Би өөрөө залгахаар миний утсыг авахгүй байна. Тэгэхээр одоо яахыг мэдэхгүй байна.

6

-Хууль шүүхээс гарсан тогтоол шийдвэрийг биелүүлэхгүй том толгой гаргаж байгаа энэ намынхантай яаж харилцах ёстой юм бэ? Нэг талаараа улс орны эрх ашиг нэн тэргүүнд байх ёстой юм биш үү?

-Бид чинь хууль зүйт нийгэмд амьдарч байгаа шүү дээ. Тиймээс хувь хүн ч бай улс төрийн нам ч бай Монгол улсын хууль дүрмийг биелүүлэх үүрэгтэй. Энэ барилга дөрвөн шат дамжаад Төрийн өмч мөн гэдгийг тогтоочихоод байхад одоо хүртэл хүлээлгэж өгөхөөс татгалзаад байгааг үнэхээр ойлгохгүй байна. Бид жил гаруй шүүхээр явлаа. 10 гаруй удаа МАН-ын саналаар шүүх хурлыг хойшлуулж байсан. Жилийн өмнө бид авчихсан бол  одоо барилга байшингаа засаад үйл ажиллагаагаа эхлүүлчих боломжтой байлаа.

6

-Өнөөдөр өглөө зарим мэдээллийн хэрэгсэлээр “ОХУ-аас МАН-д Лениний музейг бэлэглэсэн шинэ нотлох баримтууд иржээ” гэсэн утга бүхий мэдээлэл гарсан. Уг мэдээлэлд дурьдсанаар “ОХУ-ын Төв архиваас МАН-ын хүсэлтийн дагуу тухайн үеийн ЗХУ-аас намуудын  ах дүүгийн найрамдалт харилцааны бэлэг болгон Оросын ард түмний хөрөнгөөр барьсан Лениний музейн барилгыг МАН-д бэлэглэж байсан тухай тогтоол, хүлээлгэн өгсөн бичиг баримт сэлтийг явуулсан байна. Эдгээр баримтуудыг үндэслэн МАН-аас шүүхэд дахин шинээр үүссэн нөхцөл байдал хэмээн гомдол гаргах бөгөөд ОХУ-тай найрамдалт харилцааг сэвтүүлхүү үгүй юу гэсэн томоохон асуудалтай сайд Г.Оюунгэрэл тулгарав бололтой” гэсэн  байна. МАН-ынхан шинэ нотлох баримт гарч ирлээ гээд дахин шүүхэд хандах  магадгүй бололтой. Энэ тохиолдолд музейн асуудал хэрхэн шийдэгдэх бол?

-Ер нь монголын асуудлыг Москвад шийдэхээ болиод удаж байгаа ш дээ.

6

- Ажлын хэсэг цаашид ямар арга хэмжээ авах вэ?

-Бид одоо яахав дээ. Түлхүүр энэ тэр нь байхгүй юм чинь. Ямар ч байсан очоод МАН-ынхантай ярья. Хэдийд боломжтой эсэхийг нь асууя. Ямар шалтгаанаар ирээгүй гэдгээ тайлбарлах байх. Уг нь шүүхийн шийдвэрээр албадан чөлөөлөх арга хэмжээ авахыг заасан байгаа. Удаа дараа ингэж шүүхийн шийдвэрийг үл хүндэтгэх юм бол хуулийн дагуу албадан чөлөөлөх арга хэмжээ авахыг ШШГЕГ-т хандана.

й

-Өнөөдөр зөвхөн музейн барилгыг хүлээн авах байсан уу?

-Бид шүүхэд музейн барилгын асуудлаар хандсан. Дараа нь музейн үзмэрээ авъя гэж МАН-д мэдэгдсэн.  бид авна. Нэг ч үзмэр байхгүшй гэсэн. Бид Цагдаагийн байгууллагад хандсан. МАН-ын зүгээс В.И.Лениний музейн үзмэрүүд намын байр шатахад бүгд шатсан учраас үзүүлэх боломжгүй гэсэн тайлбар өгсөн юм билээ. Гэхдээ шатсан гэсэн тайлбараас өөр нотлох баримт байхгүй байгаа. Цагдаагийн байгууллагаас энэ хэргийг хэрэгсэхгүй болголоо, хаалаа гэсэн мэдээлэл ирсэн гэдгийг холбогдох хүмүүс мэдээлсэн. Тэгэхээр В.И.Лениний музейн хуучин үзмэр байхгүй болсон гэж ойлгож байгаа.

й

-Ер нь Лениний музейтэй адил хувьчлалын асуудалтай газрууд байгаа юу?

-Засгийн газар энэ тал дээр анхаарч ажлын хэсэг гарчихсан ажиллаж байна. Хүүхэд залуучуудын чиглэлээр ашиглаж байсан барилгын ашиглалтанд дүн шинжилгээ хийх ажлын хэсэг томилогдон ажиллаж байгаа. Эргэж харах асуудлууд зөндөө л байна.

й

П.Наран