Улсын Их Хурлын дарга Д.Дэмбэрэл УИХ дахь МАН-ын бүлгийн ахлагч Ө.Энхтүвшин, АН-ын бүлгийн ахлагч Ч.Сайханбилэг нартай өнөөдөр үдээс хойш уулзаж, сонгуулийн хуулийн хэлэлцүүлгийг түргэвчлэх талаар зөвлөлдөв. Улсын Их Хурлын дарга сонгуулийн хуулийг ойрын өдрүүдэд батлах шаардлагатай байна. Иймээс УИХ дахь намын бүлгүүд зөвшилцөж буй асуудлаа яаралтай тохирч, хуулийг батлах ажилдаа орох хэрэгтэй гэсэн шаардлагыг тэдэнд тавилаа. УИХ дахь намын бүлгүүд ч хуулийн төслийн зарим асуудлын талаархи зөрүүтэй байр сууриа зөвшилцлийн замаар яаралтай шийдвэрлэж, хуулийг ойрын үед батлахын төлөө байгаагаа бүлгийн ахлагчид энэ үеэр илэрхийллээ гэж УИХ-ын Тамгын газрын Хэвлэл мэдээлэл, олон нийттэй харилцах хэлтэс мэдээлэв.