Замын ачааллыг бууруулж, нэгдүгээр эгнээг чөлөөтэй байлгах зорилгоор эзэнгүй орхисон автомашиныг ачиж журамлах ажлыг нийслэл хотод эхлүүлээд багагүй хугацаа өнгөрч байна. Нэгэнт л жолооч дүрэм, журам зөрчсөн нь үнэн бол дарга, цэрэг, жирийн иргэн хэн ч байсан хариуцлага хүлээх нь зайлшгүй тул эсэргүүцэх, гомдоллох эрх хэнд ч байхгүй юм. Гэвч энэ үйл явдлын эргэн тойронд асуудал үүсэх болсон. Нэг компани дунджаар ганцхан хоногийн дотор сая гаруй төгрөгийн орлогыг олж байгаа аж. Энэ нь сүүлдээ иргэдээс өндөр хураамж авах нэг төрлийн бизнес болж байгааг жолооч нар шүүмжилж эхэллээ. Тухайлбал, машиныг нь ачих гэж байхад гарч ирсэн хүнээс газар дээр нь 70 мянган төгрөг авч байж машиныг нь өгдөг журмыг ч компаниуд өөрсдөө гаргачихаад байна. Тэр ч бүү хэл машины эзэн байхгүй ч өлгийтэй хүүхдээ орхиод явсан хойгуур нь хүүхэдтэй цуг ачаад явсан хоёр ч удаагийн тохиолдол гарсан. Дүрэм бол дүрэм гэдгийг ойлгож болох ч машин дотор хүүхдээ орхисон хүн өвлийн хүйтэнд хүүхдээ дааруулаад яахав гэж л бодсон нь мэдээж. Хэрэв хүүхэд унаж бэртэж, гэмтсэн бол хэн хариуцлага хүлээх вэ.

6

Сүүлдээ хүүхдийг нь гадаа нь уйлуулж орхиод машиныг нь ачаад явсан тохиолдол ч гарсан байна. Нэгдүгээр эгнээг чөлөөлөх эрх нь байгаа ч хэт мөнгөний төлөө энэ үйл ажиллагааныхаа утгыг алдагдуулж байна гэж хэлэгдэхэд хүрээд байгааг дээрх баримтууд нотолно. Өөр нэг асуудал нь хотын хөдөлгөөнийг зохицуулж буй ачдаг машинууд хэзээ ч жип машин ачиж яваа нь харагддаггүй. Учрыг асуувал жип машин ачихад тороос нь дийлэхгүй гээд суудлын тэрэг л журамладаг гэнэ. Тэгэхээр энэ ажил нь жирийн ард иргэдийн халаасыг тэмтэрч, жиптэй хүмүүсийг толгойг илж, дүрэм зөрчиж байгааг нь өөгшүүлсэн ажил болж байна гэлтэй.

6

Ямартаа ч энэхүү ажил эхлээд жолооч, ачигч нарын хэрүүл маргаан, машинаа хайсан эрэл хайгуул үргэлжилсээр л байна. Нэг л өдөр доорх бичлэг шиг ууртай нэгэн гарч ирэхийг үгүйсгэх аргагүй юм даа.

П.Наран