Украины экс Ерөнхийлөгч Виктор Янукович эх орондоо очиж, эрх мэдлээ сэргээхийг хүсч буй талаар “Trud.com” мэдээллээ. Тус сайтын мэдээлсэнээр, Янукович саяхан ОХУ-ын Ерөнхийлөгч В.Путинтай уулзаж энэ тухайгаа хэлсэн гэв. Тэрбээр Ерөнхийлөгчид хандаж “Би Украинд очихыг хүсч байна. Эрх мэдлээ сэргээж, төрд гарсан луйварчдыг татан буулгахад минь туслаач. Эх орондоо очиход минь Путин таны дэмжлэг хэрэгтэй байна” хэмээн хэлжээ.Оросын талаас Украины хууль ёсны Ерөнхийлөгч Виктор Янукович ирэх сарын дундуур эх орондоо очихоор болсон хэмээн мэдэгдсэн гэжээ.
Дээрх мэдэгдлийн дараа Украины Ерөнхий сайдын үүрэг гүйцэтгэгч Арсеный Яценьюк “Янукович Украинд хөл тавьсан тохиолдолд шууд баривчлах болно. Тэр бол хүнд нөхцөлд эх орноо хаясан урвагч” гэж мэдэгджээ.
Украины шинэ Засгийн газар Виктор Януковчийг огцорсон хэмээн мэдэгдэж, ирэх тавдугаар 27-ны өдөр болох Ерөнхийлөгчийн сонгууль хүртэл түр Ерөнхийлөгч Александр Турчиновыг томилсон юм. Харин ОХУ-ын Засаг захиргаа Януковчийг өнөөг хүртэл хууль ёсны Ерөнхийлөгч гэдгийг сануулаад, Украины шинэ Засгийн газрыг хууль бус гэж буй.
Саяхан Гааг хотноо ОХУ, Украины гадаад хэргийн сайд нар анх удаагаа уулзсан юм. Тэд юуны талаар ярилцсан нь өнөөг хүртэл нууц хэвээр байгаа юм.
Б.Дэлгэрцэцэг
Уншиж байна |