Төрийн өмчийн хорооны дарга асан, Үндсэн хуулийн цэцийн гишүүн Д.Сугарын хүү С.Цог нарын 12 хүнд холбогдох мансууруулах болон сэтгэцэд нөлөөлөх эм, бэлдмэл, бодисыг хууль бусаар олж авсан, хадгалсан, тээвэрлэсэн, борлуулсан хэргийг Дүүргийн эрүүгийн анхан шатны I шүүхэд хоёр өдөр хэлэлцэж, шийдвэрээ гаргасан тухай өмнө нь мэдээлсэн.

.

Тэгвэл шүүх хурлын шийдвэрийн тухай дэлгэрэнгүй мэдээллийг хүргэж байна. Шүүгдэгч Э.Золбадрал, С.Цог, Б.Энхтайван нарыг “борлуулах зорилгогүйгээр олж авсан хадгалсан” гэж үзэж Эрүүгийн хуулийн тусгай ангийн  192.1 болгон зүйлчилж, тус бүрийг хоёр жилийн хугацаагаар хорих ялаар шийтгэж, хорих ялыг жирийн дэглэмтэй эрэгтэйчүүдийн хорих ангид эдлүүлэхээр шийдвэрлэжээ.

. Мөн шүүгдэгч Т.Тамирт 1,6 жилийн хорих ял оногдуулж, хорих ялыг жирийн дэглэмтэй эрэгтэйчүүдийн хорих ангид эдлүүлэхээр шийдвэрлэсэн байна. Шүүгдэгч О.Анударийг дөрвөн  сарын хугацаагаар баривчлах ял оногдуулсан бол шүүгдэгч Г.Ууганбаярт сэтгэцэд нөлөөлөх бодисыг борлуулах зорилгоор хууль бусаар олж авсан, хадгалсан, борлуулсан нь хангалттай тогтоогдож байна гэж үзэн гурван жил зургаан сарын хорих ял оногдуулж, уг ялыг жирийн дэглэмтэй эрэгтэйчүүдийн хорих ангид эдлүүлэхээр  шийдвэрлэсэн аж.

.

Харин шүүхээс шүүгдэгч Ц.Эрдэнэбилэг, Г.Бямбасүрэн, Б.Гүнбилиг нарт холбогдох хэргийг тогтоогдсон гэж, тус бүрийг  нэг жил зургаан сарын хорих ял оногдуулсан ч хуульд заасан хөнгөрүүлэх бүрэлдэхүүнийг харгалзан үзэж мөн хугацаагаар тэнсэж хянан харгалзсан байна. Мөн шүүгдэгч Д.Одхүү, А.Анар, Н.Оюунжаргал нарт холбогдох хэргийг хэрэгсэхгүй болгож, тэднийг цагаатгажээ.

.

Б.Буд