“Ice Top” хамтлагийн экс гишүүн С.Бат-Отгоныг өчигдөр Швед улсын шүүх байгууллага хүн амины хэрэгт холбогдуулан  шүүсэн юм. Түүнийг өнгөрсөн долдугаар сарын 11-нд Шведийн Стокгольм хотын Пэли-Хэссэлби дүүрэгт Арабын иргэн 18 настай эрэгтэйг хутгалж, амь насыг нь хөнөөсөн гэх үндэслэлээр яллажээ. Шүүхийн шийдвэр гарсан эсэхийг Гадаад харилцааны яамны Консулын газрын дарга Д.Ганхуягаас утсаар тодрууллаа. -С.Бат-Отгоны шүүх хурлын шийтгэх  тогтоолын талаар мэдээлэл ирсэн үү? -Шүүх хурал өчигдөр болж өндөрлөсөн. Шүүхийн шийдвэр хараахан ирээгүй байна. Ер нь Европын холбооны улс аливаа хэргийн  шүүх хурлын   тогтоолыг тэр дор нь танилцуулдаггүй. -Хэдийгээр шүүхийн шийдвэр гарах бол. Шүүх хуралд  манай талаас төлөөлөл оролцсон уу? - Монгол Улсаас Шведэд суугаа  манай Элчин сайдын яамнаас   шүүх хуралд төлөөлөгч оролцсон.   Мөн тус улсын Өмгөөлөгчийн холбооноос  томилж өгсөн өмгөөлөгч С.Бат-Отгонд эрх зүйн туслалцаа үзүүлсэн байгаа.  Шүүх хурлын тогтоол  дор хаяад долоо хоногийн дараа гарах байх.