Спорт сонирхогч хүүхэд залуусын амьдралын нэгэн салшгүй спорт бол сагсан бөмбөг. Багийн спортуудаас хамгийн сонирхолтой, үзүүштэй өрсөлдөөнтэй тоглолтыг гаргаж чаддагаараа олны анхаарлыг сагсан бөмбөг үргэлж татсаар ирсэн. Сагсан бөмбөгийн спорттой ажил, амьдралаа холбож энэ спортын төлөө сэтгэл зүрхээ зориулсаар ирсэн үе, үеийн тамирчин, дасгалжуулагч, албаны хүмүүс анх удаагаа шинэ жилийн баяраа хамтдаа тэмдэглэх гэж байна. Төрийн бус байгууллагаас зохион байгуулах “Сагсан бөмбөгийн шинэ жил” арванхоёрдугаар сарын 11-нд болох юм. Оны торгон мөчийг хамтдаа үдэж, шилдгүүдээ тодруулах энэ арга хэмжээнд Спрайт супер лигийн найман баг, Спрайт хөгжлийн лигийн 32 баг, мөн дээд лигийн багийн эзэд, дасгалжуулагч болоод тоглогчид оролцох юм. Энэ үеэр Монголын сагсан бөмбөгийн спортын ертөнцийн шилдэг дасгалжуулагч, мэргэжилтнүүдийн санал асуулгаар сүүлийн 16 жилийн түүхэн дэх гарааны шилдэг таван тоглогч, хамгийн өндөр амжилт үзүүлсэн баг, өнөө цагийн дээд лигийн шилдэг гарааны таван тоглогчийг нэрлэх юм байна. Мөн Спрайт хөгжлийн лигийн залуусын шинэ жилийн баяр маргааш болно. Энэ үеэр Спрайт лигт хамгийн өндөр амжилт үзүүлж байгаа шилдэг гурван багийг нэрлэж, Спрайт супер болон хөгжлийн лигийн шилдэг гарааны тавыг санал асуулгаар тодруулах нь ээ.