Орост парламентын сонгуулийн дараа үүссэн нөхцөл байдал улам даамжирсаар буй энэ үед ирэх жил Путинтэй ерөнхийлөгчийн суудлын төлөө өрсөлдөх нэгэн өрсөлдөгчийн нэр ил боллоо. ОХУ-ын тэрбумтан, дэлхийн топ баячуудын нэг Михаил Прохоров өчигдөр хэвлэлийн бага хурлын үеэр ерөнхийлөгчийн сонгуульд өрсөлдөхөөр шийдсэнээ зарласан нь энэ юм. Оростоо хөрөнгийнхөө хэмжээгээр гуравт бичигддэг мөн NBA-гийн Нью Жерси Нетс багийн эзэн гэх мэт олон тодотголтой Михаил Прохоров хэвлэлийн бага хурлын үеэр “Энэхүү шийдвэр нь магадгүй миний амьдралын хамгийн чухал шийдвэр болно. Би хэнээс ч юунаас ч айж эмээхгүй итгэл төгөлдөр байна” хэмээжээ. Михаил Прохоров нь өдгөө 45 настай бөгөөд 18 тэрбум ам.долларын хөрөнгөтэй хэмээн Форбес сэтгүүлд бичигдэж байлаа. Ажиглагчид түүнийг ирэх сонгуульд Путины тун эвгүй өрсөлдөгч болж магадгүй хэмээн үзэж байна.