Хэнтий аймгийн хэмжээнд өнгөрсөн сарын байдлаар нийт 642 гэмт хэрэг гарч өнгөрсөн оны мөн үеэс гэмт хэргийн гаралт 17 хувиар өсч улсад гэмт хэргийн гаралтаар тэргүүлж байгаа тухай аймгийн цагдаагийн газрын дарга мэдээлэв. Аймгийн цагдаагийн газрын 7 хоног тутмын мэдээнд дээрэм, танхайн, хүчингийн хэрэг тасрахгүй гарсаар байгаа аж. Хэрлэн сумын 3-р багийн иргэн Б.Маналсүрэнг 11 сарын 29-ний орой үл таних хүн зодож гэмтэл учруулсан, Хэрлэн сумын 3-р багийн иргэн З.Батсуурийг 12 сарын 2-ны орой үл таних 3 хүн зодож гэмтэл учруулсан, Хэрлэн сумын 4-р багийн иргэн С.Бат-Ирээдүйг 11 сарын 30-ны орой үл таних 4 хүн зодож гэмтэл учруулсан гэх хэргүүд ойр ойрхон гарсан байна. Мөн Хэрлэн сумын 2-р багийн иргэн А.Нансалмаа 2-р багийн Булгийн 20-ийн 1 тоот хашааны нохойд хазуулсан байна. Мөн өмнө нь ойрмогхон 2-р багийн нутаг дэвсгэрт айлын нохойд хүн бариулах шахсан хэрэг гарсан байдаг. Иймээс Өндөрхаанд шөнө орой ганц нэгээрээ яваа хүнийг дээрэмдэж, зодох, нохой хазах барих аюул нүүрлэжээ.