МУНН \Монголын Уламжлалын Нэгдсэн Нам\ багш нарын ажил хаялтыг дэмжиж мэдэгдэл гаргах гэж байна. Ихээхэн эрс хатуу утга агуулгатай мэдэгдэл гарган олон нийтэд тараах гэж байгаа тухай эх сурвалж хэлсэн юм. Багш нарын ажил хаялт нь одоогийн төр үндсэн үүргээ биелүүлж чадахгүй байгааг илтгэж буй дохио, сануулга юм гээд сонгуулиар мөнгө төгрөг амлан хууран мэхэлж, төрийн эрхэнд гарсан МАНАН бүлэглэл нийгмийн баялгийг харийнханд найр тавьж буй нь эх орон, ард түмний эрх ашгаас урвасан үйлдэл гэж буруутгажээ. Таван монгол хүний халуун амь, бүлээн цус хатаагүй байхад сонгуулийн хуулийг нийтлэг эрх ашигт нийцүүлэн өөрчилнө гэсэн гол амлалтаа хамтрагчид биелүүлэхгүй, зөвхөн өөрсөддөө ашигтай тоглоомын дүрэм зохиохоор өвөр зуураа хөлөө жийлцэж байна. МУНН ард иргэдээ өмгөөлөн тэмцлийн хурц хэлбэрийг ашиглахад бэлэн, үүний сануулга болгон багш нарын ажил хаялтыг дэмжиж оролцоно гэж мэдэгдэхээр болжээ. “УИХ бол төрийн эрх барих дээд байгууллага мөн гэж заасан нь төрийг эзэнгүйдүүлэх заалт” гэж үздэгдээ дурьдаад эхлээд эд баялгаа, дараа нь газар нутгаа, улмаар хүн ард, тусгаар тогтнолоо алдах цаг ойрхон ирсэн хэмээн онцолжээ. Цалин нэмэхийг шаардах хэлбэрээр эхэлж байгаа ч олон түмнийг нойрноос сэрээх харанга болон дуугарах тэмцэл нь тэнгэрийн хүсэл зориг хэмээн ойлгож, нэгдэн өргөжүүлэхийг уриалж байна гэж МУНН мэдэгдэг гэж байна.