Эх нялхсын эрдэм шинжилгээний төвд гурав дахь хүүхдээ төрүүлэхээр очсон 34 настай эх төрөлтийн улмаас нас баржээ. Энэ сарын 1-нд тус төвд төрөхөөр  ирсэн Т гэгч бүсгүйг хүлээн авахын эмч үзээд савны амсар дөрвөн хуруу нээгдсэн байна, удахгүй төрнө гэсэн аж. Ингээд жирэмсний карт дээр нь эхийн биеийн байдал болоод хүүхдийн өсөлт  хэвийн  гэж тэмдэглэгдсэн байна. Мөн эрүүл эхийг өөрөөр нь түрүүлнэ гэж эмч нар үзжээ. Эмэгтэйд өвдүүлдэггүй тариа тарьж төрөлт эхэлсэн байна.  Удалгүй эрүүл саруул, өөрөө төрнө гэгдээд төрөхийн өрөө рүү орсон бүсгүй нас барсан тухай мэдээг  шинэ хүнийхээ тухай сонсохоор тэсэн ядан хүлээж байсан хань, ээж аавд нь   хэлсэн байна.  Эмч нарын оношлосноор эмэгтэй  төрөхийн хүндрэлээс болж цус алдаж амиа алдсан болж таарч байна. Эмнэлгийн дүгнэлтээр  талийгаач эмэгтэйн сав урагдсан гэжээ. Өвдүүлдэггүй  тарианыхаа доозыг хэтрүүлж хурдан төрүүлэх гэсэн. Мөн хүүхдийг нь багажаар татаж авахдаа алдаа гаргаснаас  ийм явдал болсон хэмээн ар гэрийнхэн нь эмчийг буруутгаж байна. Мөн хүлээлгийн танхимд байсан ар гэрийнхнийх нь гэрчилж байгаагаар эх барьсан Болормаа эмч эмэгтэйг нас барсны дараа би хүн алчихлаа шүү дээ гээд  эмнэлгийн кордироор нэг хашгирсан. Тэр бүү хэл зөвлөх эмчийг дуудаарай, лам хуваргаа дуудаарай гэсэн аж. Харамсалтай нь зөвлөх эмч нар нь эмэгтэйг нас барсны дараа иржээ. Энэ мэт эмч нарын хариуцлагагүй үйлдлээс болоод эмэгтэй хань ижил, гурван үрээ орхиод хорвоог орхив. Үрээ 10 сар эрүүл саруул тээжчихээд үнсэж ч чадалгүй хорвоог орхисон эмэгтэйн үхлийн талаар тус төвийн эмч нар янз бүрээр тайлбарлах болж. Тэдний хэлж буй тайлбар зөрж байгааг талийгаачийн эгч хэлж байна. Хүн төрөхөд эх баригч, төрөхийн эмч асрагч сувилагч нарын бүрэлдэхүүнтэй байх ёстой. Гэтэл талийгаачийг төрөхөд  эх баригчгүй зөвхөн төрөхийн эмч Болормаа ганцаараа ажилласан байна. Талийгаачийн ар гэрийнхэн нь эмч нараас  эх баригч нь яасан юм бэ гэж асуусан гэдгээ бидэнд ярьж байсан. Тухайн үед манайх эх баригчгүй гэж  хариулж байжээ.  Хэрэв эмэгтэй төрөхөд  эмч нь эх баригч, асрагч нартайгаа байгаад шуурхай арга хэмжээ авсан бол талийгаач  амьд сэрүүн байх боломж байсан гэж ар гэрийнхэн нь үзэж байгаа юм. Учир нь талийгаач эмэгтэй цоо эрүүл байсан гэдгийг хянагч эмч болон хүлээн авахын эмч  мэдэж байгаа. Тэр ч бүү хэл эрүүл учраас өөрөөр нь төрүүлэхээр болсон болж таараа. Эх нялхсын төвийнхөн дахин нэг таагүй мэдээлэл өгсөн нь  ээжийнхээ халуун уургийг хөхөж чадаагүй үлдсэн нялх үрийнх нь биеийн байдал муудсан тухай мэдээ байлаа. Ийм эмгэнэлт явдал болсны дараа эмч нар та нар ажил явдлаа дуусгаад  хүүхдийг нь аваарай гэснээр эмнэлэгт орхисон байна. Гэтэл орой нь хүүхдийг сэхээний тасагт оруулснаа дуулгажээ.  Төрсөн цагаасаа хойш  15-хан хонохдоо хүү  дөрвөн тасаг дамжиж хоёр удаа хагалгаа хийлгээд байгаа аж. Эх нялхсын мэс заслын тасгын эмч Ганбаяр хүүхдийн биеийн байдал тун муу байна, энэ хүүхэд хүчилтөрөгч дутсан байна. Бид гурав дөрөвдүгээр зэрэгтэй маш хүнд хүүхэд хүлээж авсан гэж ар гэрийнхэнд нь  хэлсэн байна. Харин  талийгаачийн ээж  энэ хүүхэд өвчтэй төрөөгүй, ээж нь хэвлийд нь байхад  4d  эход  харуулж байсан. Тэр бүү хэл төрснийх нь дараа эрүүл саруул хөөрхөн хүү төрлөө гээд эцэгт нь үнсүүлж байхад хүүхэд нь нүдээ нээж байжээ. Ар гэрийнхэн нь амь тавьж төрүүлсэн үрийг нь амьд үлдээчих юмсан гэж бодож байгаагаа ч бидэнд хэлсэн юм. Архаг хууч өвчтэй бус эрүүл саруул эх хүүхдээ төрүүлэхдээ ийнхүү нас барсан тухай мэдээлэл салбарын сайдад ирсэн эсэхийг тодруулахад  “арванхоёрдугаар сарын 1-нд нас барсан эхийн мэдээлэл ирээгүй байна. Сүүлийн үед эх хүүхдийн эндэгдэл буурч байгаа” гэсэн юм.