Гадаад харилцааны дэд сайд Б.Болор Японы Гадаад хэргийн дэд сайд К.Бэшшо-тай уулзаж, японы тал өдрийн зоог барив. Уулзалтаар Монгол, Японы харилцаа, хамтын ажиллагааг Стратегийн түншлэлийн зарчмаар өргөжин хөгжиж байгаад сэтгэл ханамжтай байгааг тэмдэглэж, цаашид энэхүү хамтын ажиллагааны багана болох худалдаа, хөрөнгө оруулалт, эдийн засгийн хамтын ажиллагааг өргөжүүлэх чиглэлээр идэвхтэй ажиллах, ялангуяа Эдийн засгийн түншлэлийн хэлэлцээр байгуулах нь чухал холбогдолтой болохыг талууд харилцан нотлов. Ирэх онд болох Монгол, Японы хооронд дипломат харилцаа тогтоосны 40 жилийн ойг ёслол төгөлдөр тэмдэглэн өнгөрүүлэх, энэ хүрээнд өндөр, дээд хэмжээний айлчлалуудыг хэрэгжүүлэх талаар санал солилцов. Мөн манай хоёр улс хоёр тал төдийгүй олон улсын талбарт идэвхтэй хамтран ажиллахаар санал нийлэв. Гадаад харилцааны дэд сайд Б.Болор өнөөдөр Токиод зохиогдох Монгол, Японы Засгийн газар, хувийн хэвшлийн 5 дугаар Зөвлөлдөх уулзалтад монголын талын хурлын даргаар оролцохоор төлөвлөөд байгаа болно.