УИХ-ын чуулганы өнөөдрийн нэгдсэн хуралдааны эхэнд Засгийн газрын агентлагийн эрх зүйн байдлын тухай хуульд нэмэлт оруулах тухай хуулийн төслийн  хэлэлцэх эсэхийг ярилцаж байна. УИХ-ын гишүүн Э.Бат-Үүл зөвхөн нийслэл Улаанбаатарт Монголын иргэд төвлөрөх бус аймаг, сумдад тарааж төвлөрлийг сааруулж, агентлагуудыг хөдөө орон нутагт байршуулах талаар санал гаргасан юм. Өнөөдрийн чуулганаар Энэхүү Засгийн газрын агентлагийн эрх зүйн байдлын тухай хуулийг хэлэлцлээ. Хэлэлцүүлгийн үеэр  З.Энхболд гишүн Э.Бат-Үүл гишүүний санаачилсан хуулийн төслийг дэмжиж “Шинжлэх ухаан, технологийн дэвшлийн ачаар дэлхий хавтгай болсон. Дэлхийн аль ч өнцөг булангаас интернэтээр холбогдож болно. Түүн шиг дэд бүтцээ сайжруулаад агентлагуудаа хөдөө орон нутагт ажиллуулж болно. Улаанбаатарт бөөгнөрөөд  суугаад байх хэрэггүй. Хэрэгжүүлэх нь дараагийн Засгийн газрын үүрэг. Хөдөө орон нутагт дэд бүтцээ сайжруулж тараан байршуулах ёстой. Хөдөө аж ахуйн их сургууль Улаанбаатарт байх шаардлагагүй. Уул уурхайн сургууль энд байх шаардлагагүй. Үүн шиг харьяалах агентлагуудыг орон нутаг руу шилжүүлэх ёстой” гэж байлаа. Гишүүн Х.Наранхүү байгалиас заяасан өргөн уудам нутгаа дүүрэн ашиглах ёстой. Гэхдээ өнөө маргаашгүй биш. Хөрөнгө мөнгөний боломж зэргээ харгалзаад агентлагуудыг орон нутагт тараан байршуулах боломжийг нь одоо нээгээд өгч болно” гэсэн юм. Энэхүү хуулийг төсөл гишүүдийн зүгээс шүүмжлэхээсээ илүү дэмжлэг авч байлаа. Ихэнх нь  хүн ам нийслэлдээ төвлөрч байхаар Дархан, Эрдэнэт, Багануур хот сурин газруудад  их, дээд сургуулиудыг  нүүлгэх эхлэх хэрэгтэй. Энэ мэтээр хотууд өргөжинө гэж байв.  Гишүүдийн олонхи дэмжсэн учир энэхүү хуулийн төслийг байнгын хороонд шилжүүллээ. Ингэснээр хотын төвлөрлийг сааруулах, агентлаг, их дээд сургуулиуд нийслэлээс гарах эрх зүйн орчин бүрдэх юм.