Даншгийн их аварга Чүлтэмээр овоглосон удамт бөхчүүдийн нутаг, дуу хуурын өлгий Дундговь аймгийн нэрэмжит аймаг цэргийн цолтой болон залуу 256 бөхийн барилдаан Монгол бөхийн өргөөнд 14 цагт эхэллээ. Өнөөдрийн барилдаанд аймгийн хурц арслан Ч.Батчулуун, Р.Пүрэвдагва, А.Алтанхуяг, Б.Одгэрэл, О.Гантулга нараар магнайлуулсан аймгийн арслан Б.Дэлгэрсайхан, Ж.Мөнгөн, М.Баярсайхан нарын тэргүүтэй аймаг цэргийн цолтой болон залуу 256 бөх зодоглож байна. Энэ мөчид барилдааны эхний дүйз дэх бөхчүүд барилдаж байна. Барилдааныг Дундговь аймгийн нутгийн зөвлөл, Засаг даргын тамгын газар, Монголын Үндэсний Бөхийн Холбоо, Түшээт ханы аварга дэвжээ хамтран зохион байгуулж байгаа юм. Харин Баянзүрх хайрханы хишиг барилдаан маргааш МБӨ-нд 14 цагт эхлэх ажээ.