Монголын сагсан бөмбөгийн холбоо зөвхөн дээд лигийн багуудыг хамарсан улиралын өмнөх сорил тэмцээн анх удаа  зохион байгууллаа. Өнгөрсөн жил лигт шинээр нэгдсэн Офицерууд аваргаар тодорч шинэ улирлын өнгөө тодорхойллоо. Сагсан бөмбөгийг мэргэжлийн түвшинд хөгжүүлэхэд холбооны зүгээс ихээхэн анхаарал хандуулж,  шат дараалсан олон ажил хийж эхэлсний нэг илрэл нь улиралын урьдчилсан тоглолт байлаа. Лигийн долоон баг гурван өдрийн турш өрсөлдөж шилдэгүүд өчигдөр тодорлоо. Энэ нь өнгөрсөн улиралын жишгээр 8 баг оролцох ёстой байсан ч МБМ Баянзүрх Бүллс баг тарж бутарсан гэх мэдээлэл байна. Ивээн тэтгэгч болоод багийн удирдлагуудын түвшинд үл ойлголцол  үүссэн гэх албан бус мэдээлэл фэйсбүүк хуудсаар цацагджээ. Дээд лигийн үлдсэн 7 баг болох Харцага, Хасын хүлэгүүд, Аватар, Ирвэс, Офицерууд,  ТиЭлЖи-13, Акулууд бүрэн бүрэлдэхүүнээрээ оролцсон. Тэмцээний аваргаар өнгөрсөн жилийн шинэ цэргүүд болох Офицерууд тодорч улиралын өнгөө тодорхойллоо. Тэдний хувьд Хасын хүлэгүүд багаас холбон тоглогч Бадрахыг багтаа нэгтгэсэн нь нүдээ олсон сонголт болсон байна. Аль ч улс оронд улиралын өмнөх тоглолтоор дамжуулан багууд бэлтгэлжилтээ шалгаж бүрэлдэхүүний өөрчлөлтөө сорьж үздэг. Монголын сагсан бөмбөгийн холбооноос анх удаа зохион байгуулсан арга хэмжээ ч энэ зорилгоо биелүүлсэн юм. Долоон багийн хооронд солилцоо наймаа хэрхэн хийгдсэн, тэдний бэлтгэлжилт ямархуу түвшинд яваа нь  хангалттай харагдаж байлаа. Пэпси лигийн шинэ улирал он гараад 2-р сард эхэлнэ  гэх албан бус тов байгаа. Лигионер тоглогчдын хувьд  Америк, Орос, Япон зэрэг улс орнуудаас ирнэ гэсэн мэдээлэл байна.   А.Алт