Узбек улсын нийслэл Ташкент хотод үргэлжилж байгаа ДАШТ-нд оролцсон эмэгтэй чөлөөт бөхийн баг өчигдөр эх орондоо иржээ. Бөхчүүдийг МЧБХ-ны дэд ерөнхийлөгч О.Амартүвшин тэргүүтэй спортынхон, медальтнуудын эцэг, эх угтан авчээ.

б

Угтах ёслолын үеэр болсон хэвлэлийн бага хурлын үеэр МЧБХ-ны дэд ерөнхийлөгч Х.Бат-Эрдэнэ “Дөрвөн жилийн дараа дахин дэлхийн аваргатай болж Гавьяат тамирчин О.Бурмаа гурав дахь медалиа энгэртээ зүүлээ. Багаараа 6 дугаар байр эзэлж ирэх онд Дэлхийн цомын төлөө тэмцээнд оролцох эрхээ өвөртөллөө. Гэхдээ зарим бөхчүүд барилдааны төгсгөлд тактикийн алдаа гаргаж медаль авах бүрэн боломжоо алдсанд багш дасгалжуулагч нар зохих дүгнэлт хийж цаашдын тэмцээн уралдаанд илүү бэлтгэл сайтай оролцуулах шаардлагатай байна. Хориод хоногийн дараа болох Азийн наадамд манай эмэгтэй бөхчүүд өндөр амжилт гаргана гэдэгт итгэж байна” гэжээ.

Харин шинэхэн Дэлхийн аварга, олон улсын хэмжээний мастер С.Цэрэнчимэд “Дөрвөн барилдаан хийж дэлхийн аварга гэдэг том цол хүртсэндээ баяртай байна, улам их хариуцлага ирдэг юм байна. Манай ерөнхийлөгч Д.Дагвадоржийн дэмжлэгтэйгээр Япон улсад хэсэг хугацаанд суралцаж тэндэхийн бэлтгэл сургуулийн шахуу хэмнэл, өндөр ачаалалд дассан маань их хэрэг боллоо, цаашид улам хичээх болно”  гэсэн байна.

ө

В.Бат