Умард Солонгосын удирдагч Ким Чен Ирийн шарилыг Пхеньян дахь Кумсусаны хүндэтгэлийн ордонд шилэн хоргонд байрлуулсан байгааг тус улсын төрийн телевизээр олон нийтэд харуулсан талаар олон улсын мэдээллийн агентлагууд уламжилж эхэллээ. Удирдагчийн цогцсыг өчигдөр Кумсусаны ордонд байрлуулж Пхеньяны төр, цэргийн томоохон зүтгэлнүүд болон түүний хүү, залгамжлагч Ким Чен Ун хүндэтгэл үзүүлсэн байна. Цэцэгсээр тойруулсан шилэн хоргонд удирдагчийн байнга өмсдөг ногоон өнгийн хувцсыг нь өмсгөж, улаан өнгийн даавуугаар хучсан байхыг ийнхүү олон нийтэд харуулсан байна. Мөн телевизээр тус улсын төрийн далбааг хагас бөхийлгөсөн ба энэ тушаалыг гадаад улсуудад байдаг Умардын бүх элчин сайдын яамдад хүргүүлсэн талаар  мэдээ уншсан тухай Өмнөд Солонгосын мэдээллийн Yonhap news агентлаг уламжилжээ.