“Бүгдээрээ дулаахан өвөлжье” сайн үйлсийн аян санаачлан зохион байгуулж, “Хамтын халуун сэтгэл” залуусын нэгдлийг эхлүүлж, “Хүний наймаа”-ны эсрэг тэмцлийг зоригтойгоор өрнүүлэн, шилдэг залуу сайн дурын ажилтан, шилдэг сайн үйлстнээр шалгарч байсан. “Лантуун дохио” ТББ-г үүсгэн байгуулж, “Боорцог ба Сарнай” номоо уншигчдын гарт хүргэсэн залуу бол Ч.Ганжавхлан. Тэрбээр “Автуус ба амьдрал” гэх өвөрмөц, содноор нэрлэж, уран зурагтай хослуулан хоёр дахь номоо хэвлүүлэн гаргажээ. Номын нээлт өчигдөр Артикур галлерейд болсон юм. Хүний амьдралд мартаж боломгүй олон зүйл байдаг ч мартчихсан явах тохиолдол байдаг. Тэгвэл “Автуус ба амьдрал” номд тэдгээр зүйлийг автобус доторх амьдралтай зүйрлэж илэрхийлэхийг хичээсэн гэнэ. Энэ номыг 14-24 насныхан уншвал тохиромжтой буюу тэдний амьдралд илүү ойрхон сэдвийг хөндсөн аж. Ялангуяа өсвөр насны хүүхдүүдийн хайр дурлал, амьдралд алдах онох, өөрийн өмнө буй олон сонголтыг зөв хийхэд бага ч болов тус нэмэр болох чөлөөт бичвэрүүдээс бүтсэн гэдгийг номын зохиогч онцолсон юм.

z

“Автуус ба амьдрал” номын бичвэр бүр зурагтай бөгөөд энэхүү зургуудыг зураач Н.Солонго нэг жилийн турш урлажээ. Түүний номонд зориулан бүтээсэн зургуудаар үзэсгэлэн гаргасан байлаа. Сэтгэлийн үгтэй, уран зурагтай, дуутай нэгэн үдшийг залуус хамтдаа өнгөрөөсөн. Үг, зураг, аялгуу гурав хүний мэдрэмж дээр огтлолцдог гэж номын зохиогч хэлсэн. Энэ үеэр мөн бусдад туслах, урам, дэм хайрлаж, чин сэтгэлийн өглөг өгөх сайн үйл үргэлжилсэн. Ч.Ганжавхлан найзуудынхаа хамт “Автуус ба амьдрал” номыг аудио хэлбэрт шилжүүлэн сонсдог ном болгожээ. Үүнийгээ харааны бэрхшээлтэй хүүхдүүдийн 116 дугаар тусгай сургуулийн сурагчдад бэлэглэлээ. Энэ нь тэдэнд барьж буй шинэ жилийн бэлэг аж. Мөн энэхүү дуут ном нь харааны бэрхшээлтэй бүх хүнд үнэ төлбөргүй хүрэх учиртай гэдгийг тэмдэглэв.

a

Тэрбээр сонсдог номоо “дуут ном” гэсэн нь оновчтой санагдсан. Харин номын нэрэндээ автобус бус автуус буюу монголчуудын харь хэлнээс “нутагшуулан авсан” үгийг сонгосныг олон хүн шүүмжилж байсан. Уг нь эрт үеэс манай монголчууд харь хэлний үгийг өөрийн хэлний үгийн сандаа авахдаа энэ мэтчилэн монголжуулж авдаг байсан нь хэлний дархлаагаа хамгаалж байсан гэж хэл шинжлэлийн эрдэмтэд тайлбарласан байдаг. Харин өөрөөс нь энэ тухай лавлахад “Энэ номыг уншвал ойлгох юм бий. Автобус гэдэг үгийг монгол хэлнээ хөрвүүлвэл нийтийн хөсөг гэж ярих ёстой байх. Автуус гэснийг хараад олон хүн шүүмжилж, монгол хэлээ аврах тухай ярьж эхэллээ. Ингэж шүүмжлээд бусад хүнийг давхар шүүмжлээд эх хэлээрээ ярьж, хэлж, энэ асуудлыг цэгцтэй болгоосой гэсэн хүсэл надад байдаг” гэдэг хариултыг өгсөн.

s

Ийнхүү бусдаас хүлээлт хүсэхгүйгээр өөрийн дуртай зүйлээ хийж буй, ихэнх тохиолдолд тэр нь хүмүүст нөлөөлж чаддаг түүний номын нээлтээс гарсан юм. Харин тэрбээр найзуудынхаа бэлэглэсэн сандал дээр суугаад “Автуус ба амьдрал”, “Боорцог ба сарнай”-гаа үнэнч уншигч, дэмжигчдэдээ тараасаар үлдлээ. Бусдаас хүлээлт хүсдэггүй, хэн нэгнээс хараат бус түүний сайн үйлс үргэлжилсээр байг.

a

as

Б.Бэхи

Гэрэл зургийг П.Нарандэлгэр