Монгол Улсын филармонийн хэрэгжүүлж буй “Монгол уран бүтээл” төслийн цуврал тоглолтууд үргэлжилсээр байна. Энэ удаагийн тоглолтод монголын орчин цагийн хөгжмийн тулгын чулууг тавилцаж, ард түмнийхээ урлан ургуулах их авьяас билгээр бүтсэн олон зууны хөгжмийн хөгжлийн уламжлалыг өрнө дахины соёл иргэншлийн гол ололт болсон "сонгомол" хөгжмийн дэвшилтэй холбож монголын хөгжмийн урлагийн түүхэнд  шинэ хуудас нээсэн уран бүтээлчдийн шилдэг бүтээлүүд эгшиглэнэ.

Тодруулбал, Л.Мөрдорж, Б.Дамдинсүрэн, С.Гончигсумлаа, Э.Чойдог, Ж.Чулуун, Ц.Намсрайжав зэрэг хөгжмийн зүтгэлтний Симфони найрал хөгжимд зориулан бүтээсэн шилдэг бүтээлийн дээжээс толилуулах “Сонгодог хөгжмийн концерт” улсын филармонийн концертийн танхимд  энэ сарын  29-ний 19.00 цагт болно.

Тоглолтыг хөгжим судлаач, соёлын гавьяат зүтгэлтэн Ч.Буянхишиг тайлбарлан үзэгчдийн хүртээл болгох аж. Тоглолт Улсын филармонийн симфони найрал хөгжимчид, удирдаач Н.Бүтэнбаяр /МУУГЗ/, Д.Нямдаш/МУСТА/, Б.Батбаатар нарын удирдлага дор үзэгч сонсогчдын хүртээл болгоно. Тоглолтын хөтөлбөрт Л.Мөрдорж “Эх орон” симфони I анги, Э. Чойдогийн “Найрамдал увертюр” /удиртгал/,  Ж. Чулуун  “Уран хас” бүжгэн жүжгийн удиртгал, Ц. Намсрайжавын “Говь гурван сайхан” симфони зураглал гэх зэрэг бүтээлүүд эгшиглэх юм.