Өнөөдөр инээдмийн баяр. Үүнтэй холбогдуулан хошин урлагийнхан өнөөдрийг хэрхэн өнгөрүүлж буйг тодрууллаа.

 

“Маск”-ын М.Баярмагнай: Бэлгээ сонгож амжаагүй

 

-Шууд.мн сайтаас ярьж байна. Танд инээдмийн баярын мэнд хүргье. Өнөөдрийг хэрхэн тэмдэглэж өнгөрүүлэх гэж байна?

 

-Баярлалаа. Эрхэм уншигч, үзэгчиддээ ч бас баярын мэндийг дэвшүүлье. Өнөөдөр манай хамтлагийнхан тоглолттой. Тоглолтоо тараад Заанаа ахын төрсөн өдрийг тэмдэглэнэ дээ.

 

-Төрсөн өдөрт өгөх бэлгээ авч амжав уу?

-Амжаагүй явна. Юу өгдөг юм билээ гэж бодоод л, замдаа явж байна.

 

 

-Нууц биш бол хаашаа явж байгаа юм бэ?

-Налайх руу явж байна. Казак түмэнтэйгээ очиж уулзая. Бас ажлаа амжуулж, Юнителийн рекламдаа тоглоё /инээв/. Орой үзэгчдийнхээ сэтгэлийг баястал, нүүрийг нь үрчийтэл инээлгэж баярлуулна даа.

 

 

“ТВ коктейл”-ын Н.Цэнд-Аюуш: “Хөгжилтэй гэр бүл” дэлгэцэнд гарна

 

-Танд инээдмийн баярын мэнд хүргье. Танай хамтлагаар сонин сайхан юу байна. Баяраа хэрхэн тэмдэглэх гэж байна?

-Өө, Баярлалаа. Өнөөдөр баяраа хэрхэн тэмдэглэх нь одоогоор тодорхойгүй байна. Манай хамтлагийн залуус их завгүй байгаа. Холливудад уригдаж тоглохоор болсон. Мэдсэн биз дээ?

 

-Нээрээ юү?

-/инээв/ Дөрвөн сарын нэгэн байлаа.

 

-Монгол хүн амны бэлгээр гэдэг удахгүй Холливудад тоглох байхаа?

 

-Тийм шүү. Сониноос өнөөдрөөс эхлэн Боловсрол сувгаар манай хамтлагийн “Хөгжилтэй гэр бүл” олон ангит кино үзэгчдийн хүртээл болно. Эрхэм үзэгчдэд маань дуулгаад өгөөрэй.

 

 

“Эмоци”-ийн Б.Баатархүү: Тоглож болдоггүй тоглоом гэж бий

 

-Танай хамтлагийн хамт олонд баярын мэнд хүргье. Уран бүтээлийн сонин сайхнаасаа уншигчдад маань сонирхуулаач?

 

-Сонин ихтэй байна. Манай хамтлаг тун удахгүй “Тоглож болдоггүй тоглоом” уран бүтээлээ өргөн барих гэж байна. Тоглолтын бэлтгэл ажил гээд завгүй хүмүүс л байна.

 

-Яагаад тоглолтоо “Тоглож болдоггүй тоглоом” гэж нэрлэсэн юм бэ?

 

-Яагаад гэдгийг үзэгчид маань тоглолтноос маань үзээсэй гэж хүсч байна. Хүний амьдралд тоглож болохгүй тоглоом зөндөө бий.

-Өнөөдөр хэр хуурагдаж байна?

-Одоогоор хууртагдаж амжаагүй л байна.

 

-Инээдмийн баярыг хэрхэн өнгөрүүлэх вэ?

-Манай хамтлагийнхан одоо 13 цагт шинэ тоглолтын дуугаа бичүүлнэ. Тэгэхээр энд л өнжих байх. Тараад юу болохыг би таашгүй /инээв/.

 

Б.Дэжид