Давосын эдийн засгийн чуулганд оролцож байгаа Монгол Улсын Ерөнхийлөгч Ц.Элбэгдорж , Швейцарийн Холбооны Улсын Ерөнхийлөгч Мишелин Калми-Рэй-тэй уулзлаа. Ерөнхийлөгч Ц.Элбэгдорж  Монгол-Швейцарийн найрсаг харилцаа идэвхтэй хөгжиж байгааг тэмдэглээд, Швейцар Улс  Монгол Улсыг дэмжиж, тусалсаар ирсэнд талархлаа илэрхийллээ.

“Швейцар Улс албан ёсны хөгжлийн тусламж олгох орнуудынхаа жагсаалтад Монгол Улсыг багтааж, энэ хүрээнд Швейцарийн санхүүжилтээр төсөл хөтөлбөрүүд амжилттай хэрэгжиж байгаад талархал илэрхийлье. Цаашдаа ч Швейцарийн хөгжил хамтын ажиллагааны нийгэмлэгээр дамжуулан хэрэгжүүлж буй хөтөлбөрөө үргэлжлүүлнэ гэдэгт итгэж байна.

Хоёр улс худалдаа, эдийн засаг, хөрөнгө оруулалтын салбарт харилцан ашигтай ажиллах боломж байгааг  харж байна. Швейцарийн тэргүүний технологи, томоохон хөрөнгө оруулалтыг татах замаар хоёр орны эдийн засгийн харилцааг гүнзгийрүүлэх сонирхол бидэнд байгаа.

Өөр нийгмийн тогтолцоонд шилжихэд 20 жил гэдэг урт хугацаа биш. Бидэнд ардчиллыг бэхжүүлэх чиглэлээр хийж хэрэгжүүлэх, бусдаас суралцах зүйл их байгаа. Танай улсын хэрэгжүүлдэг шууд ардчиллын тогтолцоог бид судалж байна. Энэ чиглэлээр хамтран ажиллах сонирхол бидэнд байна ” хэмээн Ерөнхийлөгч Ц.Элбэгдорж ярилаа.

ШХУ-ны Ерөнхийлөгч хатагтай М.Калми-Рей , Монгол Улсын Ерөнхийлөгчийн ШХУ-д хийсэн айлчлал амжилттай болсонд баяртай байна гээд,  ардчиллыг бэхжүүлэх чиглэлээр хамтран ажиллахад бэлэн байгаагаа илэрхийлэв. Манай улсад Швейцарийн Парламентын Үндэсний зөвлөлийн Ерөнхийлөгч 2008 онд айлчилж байсан бөгөөд өндөр дээд хэмжээний айлчлалын давтамжийг хадгалах нь харилцаа, хамтын ажиллагааг хөгжүүлэхэд чухал гэж хэлэв.

“Ерөнхийлөгч Таны цаазаар авах ялаас түдгэлзсэн шийдвэрийг дэлхийн олон орон, тэр дундаа ШХУ талархан хүлээж авсан. Хүний эрхийг хангах, ардчиллыг бэхжүүлэх чиглэлээр Таны хэрэгжүүлж байгаа алсыг харсан бодлого олон улсын тавцанд монголын нэр хүндийг өндөрт өргөж байгаа нь дамжиггүй” хэмээн онцоллоо.

Хоёр Ерөнхийлөгч харилцан ашигтай хамтын ажиллагааг өрнүүлэх, ардчиллыг бэхжүүлэх чиглэлээр , мөн Дэлхийн эдийн засгийн чуулганд  яригдаж буй асуудлуудын хүрээнд ярилцаж, санал бодлоо солилцлоо.

Н.Цэндээ