“Боловсрол” телевизээр үзэш бүр үзэгчдийг байлдан дагуулсан гурван найзын адал явдал дахин үргэлжилж байна. "Эмоци" продакшны жүжигчин О.Тэмүүжин, Д.Түвшинтөр, Г.Анхбаяр нар "Гурван найз яасан байх нь уу?" хэмээх бүрэн хэмжээний инээдмийн уран сайхны киногоо үзэгчдэдээ толилуулахад бэлэн болжээ.

“Кистоун” фильмс, “Эмоци” продакшны хамтын бүтээл “Гурван найз: Яасан байх нь уу?” уран сайхны кино өчигдөр “Тэнгис” кино театрт 16:30 цагаас, “Өргөө-1” театрт 20:00 цагаас тус тус нээлтээ хийлээ.

Улаан хивсний ёслолд гол дүрийн жүжигчид болох О.Тэмүүжин, Д.Түвшинтөр, Г.Анхбаяр нар болон жүжигчин Б.Баатархүү, Ш.Алтанцэцэг, Г.Нарансолонго, Б.Ариунцэцэг, Б.Баярмаа зэрэг жүжигчдийн баг бүрэн бүрэлдэхүүнээрээ оролцсон юм. Энэ үеэр киноны дуу болох “Үүрд хамт” дууг “Бид 4” хамтлагийнхан дуулсан бол, дуучин Цэцэ, Цэлмүүн, “Люмино” зэрэг хамтлаг дуучид шинэ уран бүтээлээ сонсголоо. 

Энэ үеэр Эмоци” продакшны захирал Д.Түвшинтөр "Гадны сериал тэр тусмаа солонгос киноноос уяатай байдаг үзэгчдийг "Гурван найз" олон ангит кино өөртөө татаж, найз нөхдийн үеэрхэл үнэ цэнийг хөгжилтэйгээр дэлгэн харуулж чадлаа. Манай энэ кино өмнөх 40 ангит кино зохиолоосоо өөр шинэлэг адал явдалтай" хэмээн тодотгож байсан юм. Мөн "Чадварлаг уран бүтээлчдийн бүтээсэн дүрүүд, хөгжилтэй, хөгтэй адал явдал үзэгчдэд инээд хөөр бэлэглэхийн зэрэгцээ нөхөрлөлийн үнэ цэнэ, мөн чанарыг харуулна" гэдгийг уран бүтээлчид онцолж байлаа.

"Гурван найз яасан байх нь уу? кинонд "Эмоци" продакшины залуу жүжигчид тоглохоос гадна жүжигчин Т.Бархүү, А.Туяа, "Маск" продакшны Д.Дэлгэрсайхан нар оролцон тогложээ. Кино зохиолыг жүжигчин О.Тэмүүжин, зохиолч Ж.Оргил нар хамтран бичиж, найруулагчаар нь Ч.Ганзориг ажиллажээ.

Гурван найзын адал явдал “Гурван найз яасан байх нь уу?” киногоор өндөрлөхгүй гэнэ. Тэдний адал явдлууд цааш үргэлжилсээр байх бөгөөд “Гадаадад яасан байх нь уу?”, “Баруун этгээдэд зорчсон нь” гэх мэтээр дараа дараачийн үйл явдлуудыг үзэгчдэдээ хүргэхээр зорьж байгаа гэсэн шүү.

Хүүхнүүд хөл алдан гүйдэг сайхан төрсөн Төгөлдөр, охид бүсгүйчүүдийн араас гүйх овжин сэргэлэн Цэрэндалай, үргэлж л бүтэлгүйтэх үнэнч сэтгэлт Санчир нарын цоо шинэ адал явдлыг “Тэнгис”, “Өргөө”, “Соёмбо”, “Хүннү”-гийн дэлгэцээр үзээрэй.

Б.Дэжид