Персийн булангийн тэнгист байрлаж буй АНУ-ын нисэх онгоц тээвэрлэгч онгоцуудыг ойрын хугацаанд тус бүс нутгаас гаргахыг Иран улс шаардсан тухай мэдээлэл олон улсын мэдээллийн хэрэгслээр цацагдаж эхэллээ. Сүүлийн өдрүүдэд Иран улс дунд тусгалын сүүлийн үеийн өндөр хүчин чадал бүхий баллистик пуужин амжилттай туршсан тухай шуугиан дэгдээд байгаа. Тэгвэл Иран улс Персийн булангаас АНУ-ын хөлөг онгоцуудыг гарч явахыг шаардсан нь дахин олон улсын хэмжээнд томоохон шуугиан дэгдээж эхэллээ. АНУ-ын Төрийн департамент хариу мэдэгдэл хийж Иран улсын шаардлагыг хүлээн авахгүй гэдгээ мэдэгдээд байна. Тодруулбал Персийн булан дахь олон улсын харьяаллын тэнгист тус улсын хөлөг онгоц тээвэрлэгчид байгаа тул энэ шаардлагыг хүлээн авахгүй гэдгээ Цагаан ордноос мэдэгджээ. Олон улсын ажиглагчид Иран улсыг баллистик пуужин амжилттай туршсаныхаа дараа ийм мэдэгдэл хийсэн нь учиртай хэмээн таамаглаж байна.