Өөрийгөө хамгаалалтад авахыг Тагнуулын байгууллагаас хүсээд байсан Д.Нинж одоо Ганц худагт хоригдож байна.  Монголын төрд  бугшсан идээ бээрийг юутай хээтэй нь гаргаж хаяна, Засгийн газар, УИХ-ыг тараана гэсэн зорилгын дор байгуулагдсан гэх “Монголын ард түмний хянан шалгах хороо”–г удирдаж буй тэрбээр  юуны учир  өөрийгөө хамгаалуулахыг хүссэн бэ.

Тэрбээр   арав гаруй хоногийн өмнө С.Зориг агсны аллагатай холбоотой асуудлаар хэвлэлийнхэнд хандсан юм. Ардчиллын төлөө мөр зэрэгцэн зүтгэж явсан С.Зориг агсны үхэлд хэн буруутай вэ гэдгийг тогтооход дөхүүлээд өгчих хэд хэдэн баримт бий гэдгийг хэлж, өдгөө төрийн өндөр дээд албан тушаалд байгаа  нэр бүхий хүмүүстэй холбоотой, тухайн үед өрнөж байсан яриа, үйл явдлуудыг сар, өдөр, цаг, минуттай нь хэлж ярьж байсан билээ.

Мөн МАН-ынхан  нэрээ Дээд шүүхэд бүртгүүлэхдээ 500 мянган ам.долларын хахууль  өгсөн гэх баримт нь байгаа гэж ярьж байсан юм. Тэгэхээр ид эрх мэдэлтэй байгаа хүмүүсийн эсрэг  багагүй зүйлийг ярьсан Д.Нинж ямартай ч хоригдлоо. Чухам яагаад түүнийг хорьсон бэ гэдгийг үргэлжлүүлэн мэдээлнээ.