Өнөөдөр Улаанбаатар палас-д 19:00 цагаас "Хайрын хүч" хандивын тоглолт болно. Уг тоглолтыг хөтлөгч Б.Тамир болон түүний гэргий М.Болормаа нарын ангийн хамт олон, найз нөхөд зохион байгуулж байгаа юм.

Сүүлийн үед сошиал ертөнцөд олны хүндэтгэлийг ихэд хүлээгээд байгаа залуу бол хөтлөгч Б.Тамир билээ. Тэрээр эхнэр М.Болормаатайгаа танилцаад 2013 онд хуримаа хийсэн боловч  зургаан сарын дараагаар эхнэр М.Болормаагийн бие нь муудаж эхэлсэн байна.

Тэрээр 2014 онд өвчний ерөнхий оношыг тодруулахад маш ховор тохиолддог ясны хорт хавдар гэсэн аймшигт хариуг сонсжээ. Тэд химийн эмчилгээ, туяан эмчилгээ зэргээр маш олон эмчилгээ хийлгэсэн боловч түүний бие сайжрахгүй л байгаа юм.

Тэдний мэдээлэл интернэт ертөнцөд цацагдаж эхэлсэнээс хойш маш олон хүмүүст хүрч чин сэтгэлийн дэм, урам хайрласаар байгаа төдийгүй тэднээр бахархаж байгаа юм. 

Мянга мянган хосууд хайрандаа хөтлөгдөж болзох энэхүү тоглолтонд МУГЖ Т.Ариунаа, "Эмоци" продакшн, BX, Баярцэцэг, Наагий, Баярцэнгэл, Бичүү, Амина, Мөнхбат&Үүрээ, "L guards", "Салхи", 3 бүдүүн, "Outlaw", "Мөнхийн реп", "Нэгэн зүгт", "Take off", "Fire", "Sync", "Motive", “Улаан туг” бүжгийн хамтлагууд болон дуучдаас С.Амармандах, Сэлэнгэ, Бобо, Анхаа Халиун, Хишигдалай, Жавхлантөгс, Зоригт, Gee, Цэцээ, Дандий зэрэг монголын шилдэг уран бүтээлчид оролцож хос залуусд хайрын хүчээ хайрлах нь ээ. 

Ингээд хайрынхаа төлөө тэмцэж яваа залуу хосоо дэмжиж мянга мянган хосуудыгаа энэ үдэш нэгэн оройг рок, попын ододтой хамт мартагдашгүй өнгөрүүлж тэдэнд хайрын хүч бэлэглэцгээе.

Б.Дэжид