"Милл" кино компани, "Нүдэн" филмийн дэлгэцийн уран бүтээл "Made in Ulaanbaatar" уран сайхны кино өчигдөр нээлтээ хийж, үзэгчдийн хүртээл болж эхэллээ.

Тус кино хот хөдөөгийн амьдралын ялгааг тун сонирхолтойгоор харуулж чадсан адал явдалт инээдмийн төрлийн кино юм.

Киноны ерөнхий продюссерээр Ч.Даваабаяр, продюссер Д.Баттөмөр СТА, ерөнхий найруулагч Л.Лхагважаргал, зураглаачаар Д.Мөнхбат нар ажилласан бол гол дүрийг жүжигчин СТА Г.Эрхэмбаяр, Д.Баттөмөр, нар бүтээжээ. Дүрүүдэд энэ оны шилдэг эмэгтэй дүрийн шагналт О.Долгор болон О.Мөнх-Эрдэнэ зэрэг олон сайхан жүжигчид тоглосон байна.

Киноны нээлтэд бизнес, спорт, урлаг соёлын олны танил хүмүүс ирсэн юм.

Тухайлбал, Хөдөлмөрийн баатар П.Сэрдамба, United Colors Of Benetton-ны захирал хатагтай Н. Оюунбат, сагсанчин Санчир, мисс М.Уянга, Реппер Жий, нийтийн дуучин Болд гэр бүлийн хамт, Mass группын захирал Даваабаяр, Д.Дагвадоржийн “шинэхэн” гэргий Лагшми, Тол модеь Ариунбилэг, фото модель Мөнхжаргал нар гэр бүлийн хамт хүндэтгэлийн суудалд заларч харагдлаа.

Мөн киноны уран бүтээлчид маань улаан хивсны ёслолд монгол дээлтэй алхсан нь содон байв.

Нээлтийн эхэнд "Увертюра" хамтлаг, реппер Gee нар ая дуугаа өргөж, үзэгч түмний сонорыг мялаасан юм.

Дашрамд дуулгахад, "Made in Ulaanbaatar” уран сайхны киноны дуу сүүлийн үед “хит” болоод байгаа юм. Тус дууг реппер Gee хийсэн аж.

Хүмүүс бие биендээ ханддаг муухай хандлагаа болъё

Түүнтэй тус киноны дуу хэрхэн бүтсэн талаар цөөн хором ярилцлаа.

-"Made in Ulaanbaatar” уран сайхны киноны дуу хэрхэн бүтсэн бэ?

-Энэ бол кинонд зориулсан дуу л даа. Анх энэ дуу арай өөрөөр хийгдэх ёстой байсан юм. Киноны зураг авалт дууссаны дараа "Made in Ulaanbaatar” уран сайхны киноны найруулагч, зохиолч хоёр маань над дээр ирээд дуугаа дахиад өөрчлөе гэж ярилцсан. Тэгээд л тэдний саналын үндсэн дээр энэ дуу бүтсэн.

-Дууны үгэнд “Мах идэж чаддаг мөртлөө, махаа эвдэж чаддаггүй” хэмээн үглэсэн байдаг. Үгийнхээ санааг хаанаас авсан бэ?

- Дууны маань гол санаа нь хот, хөдөө хоёр өөр өөр орчинтой гэж хэлэхийг хичээсэн. Хөдөө амьдардаг хүмүүсийг хотод ирэхээр бид яаж хүлээж авдаг билээ, яаж ханддаг билээ. Харин хөдөө хотынхон очихоор тэд бидэнд хэрхэн ханддаг билээ. Хамгийн гол нь хүмүүс бие биендээ ханддаг муухай хандлагаа болъё гэсэн санааг өгүүлж байгаа.

-Өөрөө хөдөөний амьдралыг хэр мэддэг вэ?

-Мэдэх юмаа мэднэ. Мэдэхгүй юм аа мэдэхгүй. Би бол төгс хүн биш. Би бүгдийг мэдэхгүй.

-Таны сүүлийн үед дуунуудыг сонсоход нэг хэвийн болсон юм шиг санагдсан.

-Хүн юм хийх хэцүү. Хийхгүй байх бүр хэцүү шүү дээ. Хүмүүс миний дууг хүссэнээрээ л хүлээж аваг. Мууллаа гээд би эмзэглэхгүй. Сайллаа гээд би нисэхгүй. Би байгаагаараа л байна.

-Одоо ямар уран бүтээл дээр ажиллаж байгаа вэ?

-“Дессант” хамтлагатай хамтарсан “Хам” цомог дээрээ ажиллаж байна.

Кинонд хөдөөнөөс хотод суурьшихаар Бодь аавынхаа гэрээсэлж үлдээсэн хашаанд амьдрахаар хот руу явна.Бодь хот мэдэхгүй учир хот орж үзсэн Болд найзаа дагуулан явж хотод ирнэ.Гэтэл аавынх нь үлдээсэн газар нь хотын төвд байх бөгөөд тэр газрыг нь авах гэж барилгын компаниуд зүтгэнэ.

Харин Бодь аавынхаа гал голомтыг алдахгүйн тулд найз Болдтойгоо барилгын компаниудтай тэмцэж эхэлнэ. Энэ үйл явдлын дундуур Болд “Мах иддэг монгол хүн байж, хөдөөний хүнийг яагаад “мал” гэдэг юм бэ. Хөдөөнийхөн мал биш, хөдөөнийхөн хүн” гэж хэлнэ. 

Ямартаа ч, киноны  үйл явдал цаашаа хэрхэн өрнөхийг үзэгч та бүхэн Тэнгис, Өргөө кино театруудаас үзээрэй.

Б.Дэжид