Хүүхдийн урлан бүтээх төвийг нээлттэй дуудлага худалдаагаар худалдаж, зарагдсан мөнгийг нь нийслэлийн төсөвт төвлөрүүлэх шийдвэрийг НИТХ-аас гаргасан.

Нийслэл хотод хүүхдэд зориулан ямар ч төлбөргүйгээр үйл ажиллагаа явуулдаг цорын ганц байгууллага нь Ардын багш Б.Цэрэндоржийн нэрэмжит Хүүхдийн урлан бүтээх төв. Энд өдгөө нийслэлийн дүүргүүдийн 121 ерөнхий боловсролын 2-12 дугаар 1000 гаруй сурагч хичээллэж, чөлөөт цагаа зөв боловсон өнгөрүүлж, өөртөө, ирээдүйдээ хэрэгтэй зүйлсийг сурч мэдэж байна.

Өнөөдөр тус төвийн сурагчид, тэдний эцэг эхчүүд Хүүхдийн урлан бүтээх төвийг хувьчлахыг эсэргүүцэж буйгаа илэрхийллээ. Түүнчлэн тус төвийн сурагчдын эцэг эхчүүд нийлэн Түр хороо байгуулан тэмцэхээр болжээ. Эцэг эхийн зөвлөлийн гишүүн М.Лхамдорж “Өнөөдөр хүүхдээс мөнгө нэхэлгүйгээр, ашиг хонжоо харалгүйгээр үйл тэдэнд зааж сургаж байгаа ганцхан газар нь Хүүхдийн урлан бүтээх төв байна. Үүнийг хувьчилна гэж байгаа нь хүүхдийн эрхийг зөрчиж буй явдал. Бид хүүхдийнхээ эрхийг хамгаалахын төлөө явна” гэлээ.

Хүүхдийн урлан бүтээх төв нь анх 1988 оны есдүгээр сарын нэгэнд БНМАУ-ын сайд нарын зөвлөлийн тогтоолоор “Пионер сурагчдын сургалт үйлдвэрийн төв” нэртэйгээр байгуулагдаж байжээ. Түүнээс хойш үйл ажиллагаа явуулсаар 1993 онд Монголын Хүүхдийн урлан бүтээх төв нэртэй болсон. Хүүхдийг мэргэжлийн чиг баримжаатай болгож, тодорхой түвшний мэдлэг ур чадварыг эзэмшүүлэн өөрийн орны болон дэлхийн урлаг соёлын өв уламжлал, шинжлэх ухаан техникийн орчин үеийн дэвшилтэт технологид суурилсан гар урлал оюуны бүтээл туурвих хүсэл эрмэлзлэл, чадвартай болгох зорилготой аж.

Тус төвд анхан шат, хүүхэлдэй бэлэг дурсгал, уран сийлбэр, сүрлэн наамал, уран зураг, шүрэн урлал, уран хайчилбар, сүрлэн сүлжмэл, уран баримал, арьсан урлал, авто загвар, нисэх загвар, сүрлэн урлал, хувцас дизайн, электроник зэрэг 16 төрлийн 23 дугуйланд ерөнхий боловсролын сургуулийн 2-12 дугаар ангийн 1415 хүүхэд тогтмол, үнэ төлбөргүй суралцаж байгааг уг төвийн багш хэлсэн.

Хүүхдийн урлан бүтээх төвд цугласан ээжүүд “Энд хүүхдүүд чөлөөт цагаа маш зөв боловсон өнгөрүүлдэг. Хичээлээ хийхгүй бол дугуйланд чинь явуулахгүй гэхээр уйлдаг. Дугуйландаа явах их дуртай. Хичээл, дугуйлангаа аль алийг нь амжуулаад явдаг. Хүүхдэд зөв хүмүүжил, төлөвшил, бүтээлч сэтгэлгээ суулгаж өгдөг. Энэ төв, газрыг зарна гэдэг олон хүүхдийн ирээдүйг баллаж байгаа хэрэг. Олон хүүхэд гудамжинд гарна даа. Эцэг, эх нь хөгжлийн бэрхшээлтэй, амьдралын боломж бололцоо муутай айлын хүүхдүүд ч энд хичээллэдэг” гэж ярьж байлаа.

Хүүхэд зориулсан бусад секц, дугуйлан өндөр үнэтэйгээс гадна анги дүүрсэн гэдэг шалтгаантай байдгийг ч эцэг, эхчүүд онцолж байсан.

Хүүхдийн урлан бүтээх төвийн барилга, байгууламж тийм ч их муудаж, дор ороогүй. Хамтын ажиллагаатай байдаг дипломат харилцаатай улс орнуудын элчин сайдын яаманд барилгын засвартай холбоотой төсөл өгч шийдвэрлүүлэх хэмжээнд явж байгаа аж. Тухайлбал, Япон улсын Засгийн газрын “Өвсний үндэс, соёлын хөтөлбөр”-т төвийн барилгын хадгалалт, насжилтыг тогтвортой байлгах үүднээс дээврийн завсарыг 150 сая төгрөгийн боломжит нөхцлийн төсөлд хамрагдахаар тус улсын элчин сайдын яамны Соёл, боловсролын хэлтсээр дамжуулан Япоын Засгийн газарт материалаа хүлээлгэн өгөөд байна.

Мөн Франц улсын улсын элчин сайдын яаманд “Урлаг” танхимын гэрэлтүүлгийн тоног төхөөрөмжийг солих, шинээр хүүхэлдэйн жүжгийн анги нээж болох тухай тусгасан нийт 200 сая төгрөгийн өртөгтэй төслийг дэмжүүлэхээр хүлээлгэн өгөөд байгааг тус төвийн багш ярилаа.

Энэ онд зохион байгуулсан Монгол-Япон, Монгол-Франц, Монгол-Энэтхэг, Монгол-Солонгос дөрвөн орны элчин сайдын нэрэмжит, тус орны элчин сайдын яамны дэмжлэг, шууд туслалцаатай зохион байгуулагдсан уран зургийн болон гар урлалын уралдаанд Хүүхдийн урлан бүтээх төвийн сурагчид амжилттай оролцжээ.

Энэхүү төвийг хувьчлах гэж байгаа нь эртнээс бэлдсэн, зохион байгуулалттай ажил гэж хардаж буйгаа ч эцэг эхчүүд нуугаагүй юм.

Б.Хүлэг