УИХ-ын гишүүн Ц.Сэдванчиг Монгол Улсын Ерөнхий сайдад хандан  "Хөвсгөл аймгийн Ханх хилийн боомтын ангиллыг олон улсын болгон өөрчлөх, хүчин чадлыг нь нэмэгдүүлэх талаар авч байгаа арга хэмжээ, ажлын явцын талаарх асуулга" тавиад байсан. Тэгвэл өчигдөр хариуг өглөө. Гэхдээ Гадаад харилцааны сайд Г.Занданшатар уг асуулгад хариулсан юм. 

Хуралдаа, Хил хамгаалах ерөнхий газрын дэд дарга А.Лхагвасүрэн, Гаалийн ерөнхий газрын дэд дарга Д.Оюунчимэг, Гадаадын иргэн, харъяатын эрхлэх газрын дарга Д.Мөрөн, Гадаад харилцааны яамны Гэрээ, эрх зүйн газрын захирал Ч.Баттөмөр, Гадаад харилцааны яамны Гэрээ, эрх зүйн газрын Хилийн боомтын бодлого хариуцсан тасгийн дарга Д.Ганболд, Гаалийн ерөнхий газрын Зөрчлөөс урьдчилан сэргийлэх хэлтсийн дарга Д.Довчинсүрэн нар байлцаж оролцсон. Асуулгын хариултыг Гадаад харилцааны сайд Г.Занданшатар танилцуулав. Танилцуулгатай холбогдуулан УИХ-ын гишүүн З.Энхболд, Ц.Сэдванчиг, Р.Амаржаргал, Н.Энхболд, Р.Гончигдорж, С.Баяр нар асуулт асууж, ажлын хэсгээс хариулж, нэмэлт тайлбар өгсөн юм. Оросын тал зэрэглэлийг нь унагаад явсан, манай тал ч хариу арга хэмжээ аваад бүтэхгүй байгаа энэ боомтын асуудал зөвхөн манай тойргийн асуудал бус Монгол Улсад хэрэгтэй, Хөвсгөлийн тэр хавийн иргэдэд тун ач тустай асуудал байгаа юм гэдгийг Ц.Сэдванчиг гишүүн онцлоод, тэнд ажиллаж байгаа төрийн албадын уялдаа холбоо тааруу, хэдэн тийшээ харсан амиа аргацаасан байдал нь ажлын үйл явцад нөлөөлж, иргэдийн эрх ашиг зөрчигдөж байгаад санаа зовниж буйгаа хэлсэн.  Мөн Оросын тал асуудалд маш хүндрэлтэй ханддаг, монгол иргэдэд дарамттай хандаж, чирэгдэл бэрхшээлтэй үйлчилгээгээ явуулдаг талаар иргэд гомдол санал ихтэй байдаг юм билээ гэж байв. Мөн түүний санаачилгаар 2009 онд хоёр тал нэг уулзалт хийсэн боловч баахан амарч, идэж ууж аваад хоёр тийшээ одсон тухай нутгийн иргэд ярьсан гэж хэллээ. Тус боомтын дэд бүтцийн талаар энд нэлээд хөндөгдлөө. Оросууд болохоор асуудлыг баримттай тавихыг манай талаас хүсдэг гэдгийг хуралд ирсэн мэргэжилтнүүд ярьж байв. Хэлэлцүүлгийн үеэр УИХ-ын гишүүн С.Баяр, боомтын ангилал гэж яриад байна, үүнийг өөрчлөх боломжтой юм биш үү гээд, энэ боомт улирлын чанартай тул тийм байдалтай болгох нь зүгээр гэсэн. Тэрээр, Монголын иргэдийн асуудал тун чухал. Үнэндээ хоёр талыг л бараг царайчилж амьдардаг улс тэнд байгаа. Гэтэл Хатгалд захын чавганц англиар яриад хоолоо олж идэж байгаа харагддаг гэсэн юм. Ер нь аялал жуулчлалыг нь дэмжих, цогцолбор боомт болгох тал дээр анхаарах хэрэгтэйг мөн онцолсон. Ингээд УИХ-ын гишүүн Ц.Сэдванчиг Засгийн газрын мөрийн хөтөлбөрт орсон энэ асуудалд Гадаад харилцааны сайд анхаарал хандуулж, санаачлагатай ажиллахыг эцэст нь хүссэн. Мөн боомтын дэд бүтцийн асуудалд УИХ-ын гишүүд анхаарал хандуулж, зам тавих асуудлыг эхлүүлж байгаа талаар хэлж байлаа.